Twitter prepara un sistema de mecenado

venres, 26 de febreiro do 2021 Marcus Fernández

JPEG - 422.4 KB
Cos Super Follows Twitter podería converterse nunha plataforma de mecenado que competise duramente con Patreon

Dende Twitter están a adiantar funcionalidades que están a ultimar e que chegarán en breve á plataforma, sendo a máis importante polas súas posibles consecuencias a posibilidade de permitir a publicación de chíos que só sexan visibles a usuarios que paguen unha mensualidade de 4,99 dólares. Esta función que chamarían Super Follow, sería unha resposta de Twitter a plataforma como Patreon, de xeito que algunhas celebridades ou creadores de contidos poderían aproveitar Twitter como canle para obter ingresos directos dos seus seareiros.
A funcionalidade de pagamento podería permitir ver chíos adicionais, acceder a un grupo, recibir un boletín por correo electrónico ou incluso lucir unha insignia indicando o apoio. Esta funcionalidade parece estar moi en consonancia coa recente adquisición de Revue, unha plataforma de boletíns por correo electrónico que contaba con opcións de subscrición, e de madurar todo este concepto podería converterse nunha plataforma moi atractiva para creadores de contidos que nos últimos tempos apostaban con máis forza por plataformas como Twitch para conseguir ingresos.
A outra nova característica que estarían a ultimar sería a de Comunidades, que sería algo semellante aos grupos de Facebook, de xeito que os usuarios poderían subscribirse a temáticas do seu interese.
Os Super Follow e as Comunidades non teñen data fixada, polo que é moi probable que antes destas novidades poidamos gozar de Twitter Spaces, unha funcionalidade que permite crear conversas sonoras dende o móbil na liña da emerxente Clubhouse, e que ten previsto chegar oficialmente en marzo aos usuarios de Android (xa está dispoñible para iOS), aínda que polo momento trátase dunha funcionalidade experimental limitada a EE.UU.
Unha vez que Twitter Spaces supere as probas do seu software para iOS e Android nos EE.UU. poderían procurar un espallamento internacional desta funcionalidade, pois dese xeito poderían eclipsar a Clubhouse, que carece de aplicación para Android e case toda a súa actividade está centrada nos EE.UU., polo que unha plataforma máis universal e cunha base de usuarios xa establecida tería moito máis doada a súa consolidación.

PUBLICIDADE