Un accesorio facilita a integración dos iPhone en producións audiovisuais

Blackmagic Design anunciou hoxe o lanzamento de Blackmagic Camera ProDock, un novo accesorio que transforma o iPhone 15/16/17 Pro e o iPhone 15/16/17 Pro Max nunha cámara de produción profesional grazas á incorporación de conexións de estudio e de rodaxe avanzadas. O dispositivo xa figura na tenda en liña de Apple a un prezo de 299,95 euros, e permite que os smartphones de Apple se integren en contornos de produción de alto nivel.
O ProDock funciona en combinación coa aplicación Blackmagic Camera para iPhone e engade compatibilidade con códigos de tempo externos, genlock, gravación en SSD, conexións de audio profesionais e saídas HDMI, entre outras opcións. A base conta con conectores BNC para sincronizar múltiples cámaras e dispositivos, unha función esencial tanto para rodaxes multicámara como para producións virtuais con pantallas LED, evitando problemas como fotogramas perdidos, pestanexos ou distorsións na imaxe.
Ademais, incorpora tres portos USB-C para control de lentes e accesorios, discos SSD de alta velocidade e alimentación continua do conxunto, así como entradas e saídas de 3,5 mm para micrófonos e auriculares, e unha saída HDMI a tamaño completo para monitorización no set. A súa estrutura con puntos de montaxe 1/4-20 facilita a integración en rigs compactos ou equipos de cine máis complexos.
Un dos puntos fortes é a posibilidade de gravar directamente en Blackmagic Cloud en formatos estándar da industria, como ProRes ata 4K ou ProRes RAW, permitindo que equipos de edición colaboren en tempo real en proxectos de DaVinci Resolve desde calquera parte do mundo.