Un cento de empresas do sector teleco xúntanse no Encontro Unify da man da galega Telenets

Recentemente celebrouse nas Adegas Cálem de Vilanova de Gaia (Portugal) un encontro de empresas cos denominadores comúns de seren do sector das telecomunicacións e colaboradoras de Unify, a compañía internacional de software e negocios na nube. Na xuntanza (terceira edición do Encontro Unify Spain) houbo presenza galega. Máis polo miúdo a da empresa Telenets, con sede oficial en Mos e exercendo de patrocinadora principal da reunión de Vilanova. No transcurso da xuntanza Unify aproveitou para presentar un novo proxecto que, nas súas palabras, “será unha revolución no mundo da comunicación e axudará ás empresas a levar unha mellor e máis sinxela xestión no seu día a día”. O nome do devandito proxecto é Circuit. O evento xuntou máis de 100 empresas do sector das telecomunicacións da Península.
Segundo nos contan dende Telenets, o prato forte da xornada celebrada nas Adegas Cálem foi un máis que interesante conxunto de novidades tecnolóxicas (servizo, soporte técnico) e de oportunidades para o negocio e a formación de calidade. O evento contou coa presenza de Nicolás Aguado, director e xestor de Canle España e Portugal de Unify Spain (quen confirmou ter “o potencial e recursos precisos para adaptarse e mesmo para ir por diante da tecnoloxía que esixe a sociedade actual”) e de Thomas Veit, vicepresidente de Canles Unify para EMEAR (Europa, Medio Oriente, África e Rusia), que compartiu cos presentes a arela de facer da marca Unify “un referente no mercado da telecomunicación”, apoiándose para iso en estratexias de mercadotecnia tradicional e en liña, co obxectivo de incrementar a súa presenza e xerar maior visibilidade de marca. Aproveitou tamén para reiterar o apoio da compañía cara a todos os socios e distribuidores.
Telenets, principal organizador do evento, destacou “o soporte e crecemento constante que ofrece aos seus partners e clientes”, apostando pola formación de calidade, que avala a compañía galega como único centro oficial de formación Unify en España, contando ademais co Certificado Pearson Veu.
A sobremesa da xuntanza chegou coa posta en longo de Circuit por parte de Unify, en palabras da compañía “un sistema de comunicación á vangarda da mensaxería instantánea que integra voz, vídeo e datos, e que está pensado de xeito específico para a xeración dos millennials, que demandan axilidade, produtividade, eficiencia, accesibilidade e profesionalidade para comunicacións”.