Un de cada tres internautas compra libros por Internet

Se un estudo pode vir máis a conta coas iniciativas que vimos de presentar hoxe en Código Cero (a da estrea do primeiro “outlet” en liña de Planeta e a posta en marcha da Biblioteca Dixital Mundial), ese é o elaborado polo portal de compra-venda PriceMinister.es, que vén de revelar que un de cada tres internautas do noso país adquiriu algún libro a través de Internet nalgunha ocasión.
A Rede está a vivir un momento máis que axeitado para as vendas, debido sobre todo ao descenso dos prezos respecto das tendas físicas, e esta nova canle de distribución tamén beneficia aos libros, que a pesar de ter os seus competidores máis directos nos blogs e nas páxinas especializadas, atopan en Internet un “mercado de ocasión” sen igual.
Segundo apunta o estudo realizado con motivo do Día Internacional do Libro e Sant Jordi (que lugar o vindeiro xoves 23 de abril), o 31 por cento dos españois internautas ten comprado un libro por Internet nalgunha ocasión, de xeito que a venda de libros en liña medrou seis puntos con respecto ao pasado ano, cando a porcentaxe era do 25 por cento.
Por outra banda, a venda de segunda man representa unha da maiores cotas do incipiente mercado de compra-venda de libros por Internet, xa que ata un 11 por cento dos internautas vendeu ou comprou un nalgunha ocasión a través deste medio.
En canto aos sexos, as mulleres compran e venden máis libros pola Rede que os homes e as idades dos e das internautas máis activos neste senso atópanse entre os 25 e os 34 anos.
O cofundador e presidente de PriceMinister, Pierre Konsciusko-Morizet, asegura que as razóns do éxito da compra-venda de libros por Internet débense a que este medio permite ofrecer “prezos moi competitivos” e que “estes non varían moito dunha tenda a outra”.