Un informe de Reuters denuncia a complicidade de Meta cos calotes en liña

Exemplo de publicación fraudulenta realizada en Meta

Meta, a empresa matriz de Facebook, Instagram e WhatsApp, está no centro dunha nova polémica tras a publicación dun informe exclusivo de Reuters. Segundo documentos internos da compañía, Meta podería ter ingresado arredor do 10 % da súa facturación anual en 2024 —uns 16.000 millóns de dólares— mediante anuncios relacionados con calotes e produtos prohibidos.
Os documentos revelan que as plataformas de Meta amosan diariamente ata 15.000 millóns de anuncios considerados de alto risco, incluíndo fraudes de comercio electrónico, investimentos falsos, casinos ilegais e produtos médicos vetados. A empresa só bloquea anunciantes cando os seus sistemas automatizados detectan unha probabilidade do 95 % ou máis de fraude. Se a sospeita é menor, Meta impón tarifas publicitarias máis altas como penalización, en lugar de eliminar os anuncios.
O sistema de personalización publicitaria da compañía contribúe a perpetuar o problema: os usuarios que fan clic en anuncios fraudulentos son máis propensos a recibir contido similar. A resposta de Meta aos informes de usuarios sobre contas fraudulentas tamén foi escasa. En 2023, ignorou ou rexeitou incorrectamente o 96 % dos informes válidos, segundo os documentos.
A Comisión de Bolsa e Valores dos Estados Unidos está investigando a empresa por permitir anuncios de estafas financeiras. En Reino Unido, Meta foi responsable do 54 % das perdas por estafas relacionadas con pagos en 2023, segundo un regulador británico. A compañía recoñece que os ingresos procedentes de anuncios fraudulentos superan con creces as posibles multas reguladoras, estimadas en ata 1.000 millóns de dólares.
Meta asegura que está tomando medidas para reducir este tipo de contido. O seu portavoz declarou que se eliminaron máis de 134 millóns de contidos fraudulentos en 2025 e que se reduciu un 58 % o número de informes de estafas nos últimos 18 meses. A estratexia interna pasa por reducir gradualmente a porcentaxe de ingresos procedentes de estafas: do 10,1 % en 2024 ao 7,3 % en 2025, e ao 5,8 % en 2027.
O informe tamén recolle casos concretos, como o dunha recrutadora militar canadense cuxa conta foi hackeada e utilizada para promover unha estafa de criptomoedas, provocando perdas de miles de dólares entre os seus contactos. Este caso exemplifica o impacto real que pode ter a falta de control sobre os contidos fraudulentos nas plataformas de Meta.
A compañía recoñece internamente que os seus produtos se teñen convertido nun piar da economía global da fraude. Mentres inviste miles de millóns en intelixencia artificial e infraestrutura, a loita contra as estafas parece quedar en segundo plano, con consecuencias directas para millóns de usuarios en todo o mundo.