Unha instalación audiovisual reivindica a memoria sonora da costa coruñesa

A instalación audiovisual TO HO BOC GE a/v regresa este sábado ás 22.00 horas á Sala de Exposicións do Pazo Municipal da Coruña cunha nova sesión en directo de son e vídeo, integrada nas actividades da Noite dos Museos organizadas polo Concello da Coruña. A proposta, creada por Juan Lesta e Marco Maril por encarga do Festival RESIS, combina paisaxe, memoria industrial e tecnoloxía xerativa nunha experiencia inmersiva concebida especificamente para o espazo coruñés.
O título da obra fai referencia á localización da antiga bucina de néboa da Torre de Hércules, un sistema de sinalización marítima actualmente en desuso que emitía avisos acústicos cara ao mar. A instalación resignifica ese elemento histórico converténdoo nunha pantalla receptora de novas mensaxes poéticas, ao tempo que recupera a relación entre a cidade e o seu patrimonio sonoro ligado á costa.
A peza emprega a posta de sol como detonante cronolóxico e motor natural da acción audiovisual, transformando o horizonte marítimo en materia creativa mediante sistemas de xeración de son e vídeo en tempo real. Sons e imaxes capturados na costa trasládanse ao interior da sala para crear unha experiencia de contemplación pausada na que o entorno natural se mestura coa creación dixital.
Juan Lesta encárgase da parte visual do proxecto, mentres que Marco Maril asume a composición sonora e o deseño de audio. Ambos constrúen en directo unha narrativa audiovisual que busca recuperar o eco das antigas sinais marítimas e convertelo nunha memoria viva da cidade.
A instalación pode visitarse ata o 30 de maio na Sala de Exposicións do Pazo Municipal da Coruña, en horario de 12.00 a 14.00 horas e de 18.00 a 21.00 horas todos os días da semana.