Unha mostra explora en profundidade o fenómeno que supón a intelixencia artificial

luns, 5 de setembro do 2022 Redacción

Afundación, a Obra Social de ABANCA, inaugura a exposición internacional AI: More than Human, un dos proxectos máis importantes do ano, obra do Barbican Centre de Londres e coproducida polo Forum Groningen de Países Baixos. A mostra propón un percorrido pola orixe, os retos e as oportunidades que a intelixencia artificial expón ao ser humano, comezando nas súas antigas raíces ancoradas no xintoísmo xaponés e os primeiros experimentos de Ada Lovelace e Charles Babbage no campo da informática, até os grandes desenvolvementos realizados desde a década de 1940 até a actualidade.
A montaxe ocupa a totalidade da sede de Afundación na Coruña e foi presentado esta mañá nunha convocatoria de prensa na que participaron Luke Kemp do Barbican Centre; Alba Meijide, comisaria da exposición; e Miguel Ángel Escotet, presidente de Afundación. Pola tarde tivo lugar a inauguración do proxecto, á que tamén acudiron Juan Carlos Escotet, presidente de ABANCA; Miguel Ángel Santalices, presidente do Parlamento de Galicia; e Inés Rey, alcaldesa da Coruña; entre moitas outras autoridades.
Luke Kemp asegurou que « confiamos en que esta exposición logrará inspirar, animar a cuestionar, debater e discutir ao redor do fenómeno da intelixencia artificial e ofrecerá novas perspectivas sobre o noso mundo. Nós recoñecemos a perspectiva única que a arte, a ciencia, a cultura, a creatividade poden achegar aos visitantes, tanto escépticos como entusiastas, achega do mundo cambiante que nos rodea e como esta creatividade e investigación poden abrirnos a novas formas de estar nun mundo desafiante».
Os visitantes poderán interactuar directamente cos obxectos expostos para experimentar de primeira man as capacidades da intelixencia artificial. É por iso que o acceso á mesma se organizou en pases cada quince minutos. O tempo medio de visita é de 1 hora, pero unha vez o visitante acceda, pode permanecer o tempo que desexe. Poderase visitar até o 5 de febreiro de 2023, de luns a domingo en horario de 12.00 a 14.00 e de 17.30 a 20.30, agás os luns que abrirá só polas tardes. Os billetes están dispoñibles na web Ataquilla.com.
A exposición, organizada na Coruña en colaboración con ILUX Visual Technologies, está dividida en catro apartados diferentes:
The Dream of AI é a primeira parada no percorrido. Nela demóstrase que os inicios da Intelixencia Artificial son moito máis antigos do que normalmente se cre, xa que se remonta a tradicións relixiosas coma o xintoísmo xaponés ou a cultura xudía. Comprender como este desexo histórico de dar vida a seres inertes permitiu ao home explorar o seu lugar no mundo axuda a entender a súa percepción e relación coa tecnoloxía.
– A segunda sección da exposición leva por nome Mind Machines e mostra como a Intelixencia Artificial cobra forma grazas aos avances informáticos e matemáticos dos séculos XIX e XX, e como estes seguiron expandíndose a gran velocidade no século XXI dando á tecnoloxía capacidades espectaculares como ocorre coas redes neuronais artificiais.
Os visitantes terán a oportunidade de ver e interactuar con proxectos de investigación e sistemas punteiros neste campo. Entre eles atópanse desenvolvementos históricos como a máquina Enigma e a máquina Bombe de Alan Turing, elementos craves no transcurso da II Guerra Mundial. Pero tamén os desenvolvementos máis recentes de empresas como DENSO Corporation, que expón o seu brazo robótico, e o departamento de Arte e Cultura de Google, que presenta unha obra interactiva que achega a intelixencia artificial á poesía británica do século XIX, entre outras moitas obras.
Data Worlds é a terceira sección de AI: More than Human. Nela ofrécese unha análise da infinidade de aplicacións que ten esta tecnoloxía, así como a súa incorporación a campos como a sanidade, o xornalismo ou o comercio.
As obras desta sección achegan ao visitante ás cuestións éticas e morais que rodean actualmente á Intelixencia Artificial e analiza como afectan no día a día, contando con desenvolvementos entre os que se atopan un simulador de condución con análise facial ou un sistema capaz de converter os obxectos que perciba en pinturas en tempo real.
– Endless Evolution é a última sección do percorrido e céntrase na área de investigación coñecida como A-Life a cal amosa como a Intelixencia Artificial se fusiona con outras disciplinas para cambiar a nosa idea do que chamamos «natural». Aquí, o visitante poderá ver, por exemplo, como millóns de copias dun álbum musical poden ser codificadas en ADN e gardadas dentro de botes de spray, ou mesmo arrecender as flores dunha árbore que se extinguiu hai máis de 100 anos.
Complementando a estas catro secciones principais, a exposición tamén conta cunha serie de instalacións especiais como Future You, creada especialmente para AI: More than Human, que permite ao visitante enfrontarse ao seu sintético do futuro. Poderá observar como o personaxe aprende os seus movementos e retalo a seguir o ritmo mentres aprende a saltar e a bailar.
Na instalación PoemPortraits o visitante poderá facerse unha fotografía e doar unha palabra á obra de arte. A palabra elixida, xunto cunha palabra dun participante anterior, incorpórase a un poema único de dúas liñas xerado por un algoritmo e mapeado no retrato.
Na instalación dinámica e interactiva a gran escala, que recibe o nome de Totem, utilízase a detección e o Machine Learning para informar sobre os patróns, ritmos e comportamentos que o rodean. Estes poden cambiar segundo a luz, o número de persoas ou o movemento da sala.
2065 é un videoxogo de mundo aberto no que os xogadores exploran unha nación na que a automatización avanzada ha eliminado a necesidade de que os humanos traballen. Nel amósase a percepción do autor de como será este ano 2065, permitindo o acceso a tres experiencias distintas con 3 portais dentro do xogo.
Finalmente, AI: More than Human presenta en exclusiva na Coruña o desenvolvemento eVidens AI que aplica as posibilidades da Intelixencia Artificial ao ámbito das viaxes e o turismo. A través dun complexo sistema de Computer Vision baseado en Machine Learning, eVidens AI creou unha rede de deep learning capaz de realizar unha análise exhaustiva e categorizada en tempo real da información contida en miles de imaxes.

JPEG - 139.7 KB
Na mostra podemos facer un repaso da intelixencia artificial até os nosos días
JPEG - 122 KB
Na convocatoria para medios desta mañá participaron Miguel Ángel Escotet, Alba Meijide e Luke Kemp
JPEG - 146.8 KB
A máquina de Babbage é unha das xoais que poden verse na mostra
JPEG - 100.2 KB
Na exposición destácanse aplicacións da intelixencia artificial que temos tan presentes como as propias aspiradoras robotizadas
JPEG - 132.9 KB
A mosta repasa grandes exemplos da intelixencia artificial como o Deep Blue que conseguiu marcar varios fitos no mundo do xadrez

PUBLICIDADE