Unha resolución xudicial deixa ao Brasil sen WhatsApp durante 48 varias horas
xoves, 17 de decembro do 2015
Unha resolución xudicial obrigou
aos principais operadores de telecomunicacións do Brasil a bloquear o uso da
aplicación WhatsApp no seu territorio nacional (durante 48 horas), na mesma
liña do que fixeran o pasado mes de
abril e pola mesma motivación: a falta de cooperación de WhatsApp coa
xustiza brasileira por unha investigación policial iniciada en 2013.
O propio Mark
Zuckerberg decidiu saír á palestra asegurando que hoxe “é un día triste para o
Brasil”, por considerar que a media xudicial está a afectar negativamente
aos máis de 100 millóns de usuarios de WhatsApp no Brasil (aínda que lembra que
Facebook Messenger continúa a estar dispoñible). Zuckerberg asegura estar abraiado
polo feito de que ante os esforzos de Facebook por protexer os datos dos seus
usuarios un único xuíz poida emprender unha sanción extrema que prexudica a
millóns de usuarios, polo que confía que a decisión xudicial poida reverterse
rapidamente.
Os usuarios, pola súa banda, están a reaccionar de dous xeitos diferentes: hai
os que optan por instalar
no seu móbil unha aplicación de VPN que facilite saltar o bloqueo
establecido polas autoridades no Brasil (accedendo ao servizo a través doutro
país) ou probar alternativas como Telegram, que está a experimentar, como en
outras situacións semellantes, serios problemas de funcionamento no Brasil nas
últimas horas, xa que recibiron máis
dun millón de usuarios novos no Brasil no último día, o que dificulta o
envío das mensaxes SMS de confirmación aos usuarios.
Cómpre salientar que no Brasil, aínda que WhatsApp é a aplicación máis popular
para smartphones (na liña do que acontece en España), a aplicación de Faceboo
Messenger tamén conta con grande popularidade, polo que non parece que as altas
masivas en Telegram vaian ter impacto a medio prazo, e queden nunha anécdota
como aconteceu en numerosas ocasións ante caídas de WhatsApp.
ACTUALIZACIÓN: Finalmente as autoridades brasileiras entraron en razón, e decidiron
desbloquear o acceso a WhatsApp no Brasil, de xeito que en vez de castigar
a millóns de usuarios do servizo, aplicaron a sanción directamente á empresa responsable
a través dunha multa de 100.000 reais (23.711 euros) cada día que WhatsApp
continúe sen entregar a información requirida polas autoridades nunha
investigación dunha organización criminal (que roubaba
bancos e caixeiros automáticos) que empregaba WhatsApp para o intercambio
de mensaxes entre os seus integrantes.