Velneo permite ás empresas desenvolver proxectos tecnolóxicos en cuestión de días

Velneo, empresa galega especializada en desenvolver solucións low code (metodoloxía de programación que permite crear aplicacións de xeito máis rápido e automatizado), vén de anunciar a nova versión da súa plataforma de desenvolvemento específica para empresas que empreguen o castelán como lingua base.
A actualización da ferramenta Velneo permite ás pemes desenvolver MVP (polas súas siglas en inglés, produto viable mínimo) de xeito eficaz en breves prazos de tempo. Con esta novidade, a empresa con sede no Porriño convértese en referente da programación low code achegando un ámbito de traballo onde todo está dispoñible en castelán: soporte, documentación, cursos, formación continua, etc.
Como afirma Mario Conde Fornós, director da empresa, “ata hai pouco en programación de software o inglés era a única linguaxe que se empregaba, pero Velneo vén cambiar as regras de xogo e usa só o español para facilitar as cousas a todos os desenvolvedores de software de xestión de fala hispana”. Neste sentido, Conde remarca que o español é a segunda lingua máis usada no mundo e cun potencial de 500 millóns de persoas.
Amais da nova versión de Velneo, para facilitar aínda máis o labor de desenvolvemento, a firma galega puxo a disposición dos usuarios “un completo ecosistema de código aberto cun amplo abano de funcionalidades como facturación electrónica e un completo ERP completamente personalizable cos módulos típicos necesarios: compras, almacén, vendas, contabilidade e TPV”.
No aspecto técnico, a firma do Porriño pon en valor a súa base de datos “fiable, estable e moi segura”. Ademais, a ferramenta permite desenvolver programas “cen por cen na nube” e “cen por cen on-premise”. Isto implica que programando unha única vez o usuario pode despregar na nube ou en local, segundo a súa preferencia.
Uno dos aspectos clave nos que incidiu a empresa foi no factor proximidade. Para logralo puxo a disposición dos usuarios sistemas de comunicación directo a través de teléfono e chat para resolver as cuestións pertinentes; “unha característica que para nada é habitual entre as empresas de desenvolvemento as cales adoitan optar por outras formas de comunicación máis frías e sen garantir o éxito na resolución de dúbidas, como acceder a un repositorio de posibles incidencias”, explican fontes de Velneo.