Verónica Bolón galardoada pola Real Academia de Ingeniería

mércores, 8 de novembro do 2023 Redacción

A Real Academia de Ingeniería vén de facer pública a concesión dos Premios Novos Investigadores do ano 2023. Entre as premiadas atópase a profesora e investigadora da Universidade da Coruña Verónica Bolón Canedo, quen acadou unha das medallas outorgadas pola institución.
A Medalla concédeselle polas súas contribucións na área da aprendizaxe de máquina, onde as súas investigacións resultan altamente citadas. Segundo a institución, os seus traballos destacan pola súa variada aplicación social, abarcando áreas como o diagnóstico de retinopatía, a corrección automática de exames no ámbito educativo e, ultimamente, nunha nova área da intelixencia artificial que busca desenvolver métodos computacionais máis eficientes e respectuosos co medio ambiente.
Bolón Canedo é profesora Titular da área de Ciencia da Computación e Intelixencia Artificial e pertence ao grupo de investigación Laboratorio de Investigación e Desenvolvemento en Intelixencia Artificial (LIDIA) da UDC.
Autora de numerosos artigos científicos e varios libros completos, así como capítulos de libros, coa súa investigación recibiu o Premio Frances Allen á mellor tese de doutoramento realizada por unha muller en Intelixencia Artificial, concedido pola Asociación Española para a Intelixencia Artificial no ano 2015, e o Premio Dona TIC Revelación da Generalitat de Cataluña no 2020. Nese mesmo ano 2020, tamén foi seleccionada como Académica de Número da Academia Joven de España como recoñecemento á súa excelente traxectoria científica e profesional. Ademais, desde o ano 2022 é Académica Correspondente da Real Academia de Ciencias Físicas, Exactas e Naturais de España.
Cabe salientar tamén o seu compromiso co fomento da vocación científico tecnolóxica entre as rapazas, coordinando o nodo da Coruña do proxecto Inspira STEAM e participando en numerosas actividades de divulgación; así como coa lingua galega. De feito, Bolón forma parte do catálogo de referentes no uso do galego que publicou onte, día 7 de novembro, a Asociación de Entidades Locais pola Lingua Galega (Alingua).
A Medalla da Real Academia de Ingeniería seralle entregada o vindeiro 21 de novembro nun acto que terá lugar na sede da institución, en Madrid.

PUBLICIDADE