Vitae Consultores celebra os seus 15 anos dende a vangarda da formación transformadora

martes, 6 de abril do 2021 S. P.

Vitae Consultores, un dos nosos grandes referentes en formación avanzada para profesionais do ámbito tecnolóxico e transformador (e tamén doutros sectores punteiros), está estes días de celebración. Concretamente, a conmemoración dos seus 15 anos de vida, tres lustros de intensa actividade acompañando ás nosas empresas e aos equipos humanos que acubillan nos seus procesos de actualización e adestramento tecnolóxico (e poñendo ao seu alcance múltiples cursos sobre diversas temáticas relacionadas coa xestión, a comunicación ou o desenvolvemento informático).
En cuestión de cifras, sinalar que o longo deste tempo a consultora galega foi quen de formar a máis de 22.000 profesionais do sector das Tecnoloxías da Información (TI), amais de ter realizado máis de 1.000 procesos de selección do sector e entrevistado a máis de 12.000 candidatas e candidatos deste ámbito empresarial.
“Estamos moi agradecidos de axudar a lado humano do sector TI, co noso traballo e esforzo e como sempre vivindo o presente tal e como vén, adaptándonos ás circunstancias con realismo”, sinalan dende Vitae, facendo chegar o seu fondo agradecemento “a todas as persoas, empresas e entidades que axudaron ou participaron a facelo posíbel cada día, colaboradorxs, clientes, candidatxs, etc”.

PUBLICIDADE