Vitae, Optare e Dathum celebran na Cidade das TIC unha xornada sobre Ciencia de Datos e xestión de persoas

A Cidade das TIC da Coruña vai acoller o vindeiro 28 de xuño, en horario de 12.00 a 13.45 horas, un evento formativo gratuíto de gran interese para as empresas e os profesionais dos sectores innovadores: a xornada Ciencia de Datos e comportamento humano aplicados á xestión das persoas. A cita vén da man das empresas Vitae Consultores, Optare Solutions e Dathum. Segundo explican co obxectivo de contextualizar o evento, “a Ciencia de datos veu para axudar á xestión dos departamento de persoas e neste evento poderemos ver un exemplo da xestión do comportamento humano nas empresas coa aplicación Dathum”.
Deste xeito, verase como utilizar esta ferramenta para a selección de persoal, tamén para predicir o comportamento humano, poder reter ao talento e coñecer mellor o estado motivacional das persoas profesionais dunha empresa.
Debullaranse os detalles dun caso real de aplicación de Dathum nunha empresa do ámbito TIC.
Os relatores serán Marcos Carbonell (Vitae), Luis Sestelo (Optare) e Roberto Rodríguez (Dathum).
A xornada dará comezo ás 12.00 horas coa recepción de participantes e a presentación.
Ás 12.10 comezará o relatorio Ciencia de Datos con Dathum para a selección de persoal, a cargo de Marcos Carbonell. Ás 12.30 exporase o caso de éxito de Dathum da man de Luis Sestelo e ás 12.50 será a quenda de Roberto Rodríguez, que abordará as posibilidades da ferramenta para predicir os comportamentos humanos nos equipos profesionais. Ás 13.30 horas está prevista a rolda de rogos e preguntas. As inscricións cómpre facelas a través da conta de correo vitae@vitaedigital.com.