Vitae e Javier Garzás brindan en xuño a quinta edición do curso de product owner e axilidade avanzada
martes, 2 de maio do 2023
Vitae
Consultores achéganos esta primavera-verán unha nova ración de
actividades formativas para subirmos chanzos na escaleira da
excelencia profesional: formación para ser mellores profesionais,
compañeiros e líderes e, tamén, para gañar en eficiencia,
eficacia, comunicación, flexibilidade, creatividade e capacidade de
resposta. Ao abeiro destes obxectivos, Vitae convocou a nova edición,
a quinta, do curso
Product Owner Axilidade Avanzada, que será impartido novamente
polo experto en transformación Javier Garzás, un dos grandes
divulgadores-formadores do panorama tecnolóxico galego e estatal.
O
curso, de oito horas de formación e con opción para obter o
certificado Scrum Manager (proporcionando 70 PDA), celebrarase os
días 7, 8 e 12 de xuño, a través da aula virtual de Vitae
Consultores.
Co
obxectivo de axudarnos a entender o contexto desta iniciativa
formativa, a consultora tecnolóxica galega explica que a figura do
Product Owner é un concepto que designa o profesional que
nas contornas áxiles representa o último responsábel do éxito do
desenvolvemento dun produto e quen se ocupa de que un equipo de
traballo aporte o máximo o meirande valor ao negocio.
Os
obxectivos desta actividade formativa pasan por afondar nas técnicas
e ferramentas específicas desta figura profesional, moi ligada aos
novos xeitos de traballo eficientes, eficaces, rendíbeis,
sustentábeis e intelixentes. Amais, farase un repaso polas leccións
aprendidas, as experiencias e as recomendacións de ter participado
en ducias de implantacións deste tipo de metodoloxía.
O
curso, segundo informa Vitae, corresponde a unha ampliación doutra
actividade formativa achegada pola consultora galega: Xestión Áxil
de Proxectos con Scrum. Está dirixido principalmente a directivos,
xefes de proxecto, product owners, expertos en Scrum,
responsábeis de calidade, responsábeis de mellora de procesos
software, consultores, avaliadores, auditores informáticos, persoal
de xerencia media e técnica da área das tecnoloxías da información
e profesionais en xeral do sector TIC.
A persoa encargada de
impartir os contidos é Javier Garzás, doutor cum laude e
enxeñeiro superior en Informática. Con estudos post-doutorais e
investigador convidado na Universidade Carnegie Mellon dos Estados
Unidos (onde desenvolveu tarefas de investigación en metodoloxías
áxiles), é experto en equipos profesionais e en recursos
innovadores para a materialización de proxectos avanzados. Até o de
agora ten axudado a máis de 80 empresas a mellorar os seus procesos
de xestión e traballo. É profesor titular na Universidade Rei Juan
Carlos. Adícase a axudar a empresas que fagan mellor software (en
tempo, con produtividade, con calidade e con felicidade). É autor do
blog javiergarzas.com, que
conta cunha media de 2.500 visitas diarias.