Vitae fornece un avanzado programa formativo para adestrarnos na arte de xestionar proxectos TI
luns, 9 de xaneiro do 2017
Vitae Consultores vén de informar de que está a
pór en xogo os seus recursos e experiencia en formación TIC
avanzada para adestrar ás nosas empresas, in situ, nas
principais e máis salientábeis metodoloxías de desenvolvemento e
manexo de proxectos tecnolóxicos. Segundo informa Vitae, o
Programa In Company da Arte de Xestionar Proxectos TIC foi
elaborado sobre unha base inmellorábel: unha experiencia formativa
de seu con máis de 1.200 profesionais en xestión, dos que un
milleiro eran do sector tecnolóxico-dixital e douscentos pertencían
a outros sectores. O dito programa, dirixido principalmente a
directores, responsábeis e xefes de proxecto, ten o obxectivo básico
de “equipalas/os” coa mellor visión de negocio posíbel e cos
recursos precisos para conseguir, nas iniciativas empresariais que
manexen e coordinen, os mellores resultados en custes, calidade e
prazos.
Segundo informa Vitae, “a xestión de proxectos
é unha das actividades con meirande grao de tensión e desgaste
profesional”. Deste xeito, “á alta complexidade e
competitividade do mercado, engádese a necesidade de xestionar
persoas e afrontar situacións de crises e conflitos”. Por esta
razón, sinala Vitae a respecto do seu ambicioso programa formativo,
“o dominio de metodoloxías, habilidades e técnicas que axuden a
equilibrar as esixentes demandas da función cos recursos das persoas
é unha garantía de mellora no desempeño”. O programa, explica
Vitae, ten como obxectivo dotar aos profesionais en dirección de
xestión de proxectos TI de recursos eficaces en tres áreas:
metodoloxías de manexo e coordinación de iniciativas empresariais,
habilidades persoais e ferramentas de especialización.
Nun plano máis concreto, o miolo do programa
abrangue contidos como dirección e xestión baixo a metodoloxía PMI
con Microsoft Project, metodoloxías áxiles (Scrum) e filosofía
Lean (Kanban e ScrumBan), xestión dos servizos TIC e
externalización, xestión de multiproxectos, recursos de motivación
e automotivación, resolución de conflitos, comunicación e
persuasión, ferramentas para facer presentacións e comunicacións
eficaces, técnicas e habilidades humanas na toma de requirimentos,
traballo equipo, recursos para a xestión do estrés, etc.
A nivel de profesionais formativos, contarase coa
presenza activa de Carlos González Jardón (enxeñeiro técnico en
Informática de Xestión pola Universidade de Vigo e PMP polo Project
Management Institute dende febreiro de 2005, amais de membro do PMI
e da entidade galega CPETIG),
Josefina Alonso Nocelo (enxeñeira superior en Informática, arestora
responsábel de Aseguramento da Calidade e Seguridade Funcional na
dirección de Electrónica e HMI do Centro Tecnolóxico de Automoción
de Galicia, o CTAG) e Marcos Carbonell García (profesional con máis
de tres décadas de experiencia nos sectores do deporte, as novas
tecnoloxías e os recursos humanos, amais de ser socio director de
Vitae Consultores dende 2006).