Vitae móstranos como recoller os mellores froitos das nosas xuntanzas de traballo
mércores, 26 de febreiro do 2020
Partindo
da base de que unha das claves do éxito dunha empresa é a boa
comunicación existente entre os seus integrantes, e de que nada
mellor que facer xuntanzas periódicas para estreitar esas ligazóns
de comunicación, Vitae Consultores vai organizar os días vindeiros
unha nova edición (a segunda) do seu Curso
Reunións Áxiles con Scrum, Axilidade Avanzada, unha actividade
formativa de 10 horas programada para os días 13 e 14 de marzo na
Coruña e impartida por Josefina Alonso. No obradoiro
introducirásenos nas mellores metodoloxías para acadar que as
xuntanzas que mantemos no noso día a día laboral sexan un exemplo
de sinxeleza, eficacia, produtividade e, tamén, bo ambiente. Ou
sexa, de acadar os máximos obxectivos cos recursos dos que
dispoñemos.
A
cita, que vén con opción de Certificación Scrum Manager,
celebrarase no Hotel Attica 21 da Coruña.
Segundo
nos conta Vitae poñéndonos en antecedentes, as reunións constitúen
decote unha perda de tempo e esforzo para os traballadores dunha
empresa tecnolóxica, ou de calquera outro sector. Os principais
inimigos das xuntanzas laborais son a falta de obxectivos claros, de
axenda de traballo, de necesidades ou de expectativas. Todos estes
condicionantes soen derivar en perdas de tempo ao abeiro dos nosos
proxectos e organizacións. A nova achega formativa de Vitae tenta
establecer unha serie de boas prácticas que nos axuden a realizar
“reunións produtivas, curtas e que sexan quen de aportar valor,
así como afondar nas xuntanzas máis relevantes de axilidade
concretamente de Scrum”.
No
obradoiro explicaranse as regras básicas así como os métodos e
técnicas máis requiridos para conducir con éxito as reunións de
Scrum. O curso proporciona 55 PDA para a Certificación Scrum Manager
e, segundo informa Vitae, non é preciso ter cursado o curso troncal
de Scrum Manager.
A
encargada de impartir estes contidos será Josefina Alonso Nocelo,
enxeñeira superior en Informática e na actualidade coordinadora de
Proxectos e responsábel de Seguridade da Calidade do Desenvolvemento
de Software na dirección de Electrónica HMI do Centro Tecnolóxico
de Automoción de Galicia, o CTAG. Josefina Alonso, ademais, posúe
unha ampla experiencia nos eidos do desenvolvemento de software e do
asesoramento empresarial e a centros de I+D (traballou para a Axencia
Europea do Espazo, o CTAG, o CITIC, Tecnocom, SIVSA, Seresco,
Coremain ou Balidea, entre outras moitas entidades).