Vitae ofrece a edición 36 do seu histórico curso sobre dirección de proxectos con Scrum

Polo seu interese empresarial e pola súa capacidade para optimizar o noso xeito de traballar, entre outras moitas vantaxes e potenciais, o Curso sobre Dirección de Xestión de Proxectos Áxiles con Scrum que organiza regularmente a consultora Vitae é sen dúbidas unha das actividades formativas da nosa terra de meirande demanda e de máis longa experiencia. Sen ir máis lonxe, chega nesta recta inicial de 2021 á súa edición 36, agora en formato virtual. O curso, en resumo, ofrécenos unha serie de claves de valor para que a aplicación de boas prácticas profesionais sexa doada, simple, eficaz e permanente no ámbito dos proxectos tecnolóxicos.
En concreto, mergúllanos nas posibilidades da metodoloxía Scrum, especialmente indicada para proxectos en contornas complexas onde é necesario obter resultados axiña, onde as condicións están suxeitas a cambios (como por exemplo as limitacións impostas pola COVID) e onde a innovación e a competitividade son piares fundamentais.
Desenvolverase en formato online (non de xeito presencial, coa finalidade de garantir a seguridade dos participantes fronte á COVID-19) os días 25, 26, 28 e 29 de xaneiro, e os días 1, 2, 4 e 5 de febreiro.
Trátase dunha actividade formativa de 16 horas que proporciona 150 PDA e, polo tanto, a Certificación Scrum Manager nivel Experto.
O curso diríxese a capacitarnos na aplicación dos modelos de traballos áxiles (Scrum, Scrumban e Lean), uns modelos que introducen factores extra de eficacia, rendibilidade e sintonía cos clientes (axudando aos primeiros a anticiparse ás demandas dos segundos mesmo antes de que sexan tan sequera transmitidas).
Segundo Vitae, a orixe do obradoiro está igualmente nas vantaxes de anticiparnos ás nosas propias demandas. Ou sexa, de preparar o camiño a percorrer para saber cara a onde dirixirnos en canto se dea unha disxuntiva. Desta maneira nolo explica Vitae: “Tendo en conta o moito que evoluciona o mercado e a necesidade das empresas de adoptar medidas para satisfacer de maneira eficaz e rápida as demandas do cliente, propoñemos este curso sobre o uso de Scrum en proxectos e desenvolvemento de software”. Esta metodoloxía, engaden dende Vitae, permitirá a implicación e auto-organización de todo o equipo profesional dunha corporación para fixar un punto de partida e definir o proceso de desenvolvemento que se executará durante o proxecto.
Nun plano máis detallado acerca do programa do curso, neste abordaranse as diferenzas entre as devanditas metodoloxías áxiles e as súas vantaxes e inconvenientes con respecto a metodoloxías pesadas como CMMI, PMI e ISO, “dando unha perspectiva global aos asistentes para que adquiran os coñecementos precisos para seleccionar a metodoloxía de dirección segundo as necesidades de cada proxecto”.
A encargada de impartir estes contidos será Josefina Alonso Nocelo, enxeñeira superior en Informática pola Universidade de Vigo. Actualmente é responsábel da área de Aseguramento da Calidade e Seguridade Funcional da División de Electrónica, HMI e Sistemas ITS do Centro Tecnolóxico de Automoción de Galicia (CTAG). Posúe máis de 18 anos de experiencia no eido do desenvolvemento de software destacando a súa actividade na xestión e dirección de proxectos TI con metodoloxías áxiles (Scrum, XP) e de predición (PMI, CMMI) para os sectores do motor, o aeronáutico e do espazo. Entre as empresas e organismos que ten asesorado figuran as seguintes: ESA (Axencia Europea do Espazo), o devandito CTAG, o Centro de Investigación TIC (CITIC), Tecnocom, SIVSA, SERESCO, Coremain, Balidea, Dayco Ensa, Grupo Antolín, PGA, ASM Soft, SoftWcare, Discalis, a Universidade de Vigo, a Universidade de Santiago, a Universidade da Coruña, o Concello da Coruña, Visual MS, Telek, Imaxdi e OpenHost, entre outras entidades.