Vitae organiza unha nova edición do seu curso sobre a exitosa metodoloxía PMI 6

martes, 15 de xaneiro do 2019 Fernando Sarasketa

Que fai a diferenza entre un proxecto de éxito e un que non chega a bo porto? Pois, alén da calidade dos elementos postos en xogo e da boa sintonía entre os membros do equipo profesional implicado, factores moi relevantes, non hai dúbida que a claridade e a organización constitúen ingredientes de peso no desenvolvemento dun proxecto tecnolóxico-empresarial, contribuíndo a enfialo cara ao que sería o destino ideal. A isto cómpre engadir a fluidez, a seguridade, a eficiencia, a eficacia, a sinxeleza e a comodidade. Como asegurar a presenza de todo isto? Existen metodoloxías para garantila? Segundo nos ensina Vitae Consultores no seu Curso Dirección e Xestión de Proxectos baixo a Metodoloxía PMI 6, os ditos recursos existen e están máis preto de nós do que pensabamos.
A nova edición do dito curso, a número 15, vaise celebrar en Vigo (Centro Social Afundación na rúa Policarpo Sanz, 24-26) os días 15 e 16 de febreiro e máis os días 1, 2, 8, 9 e 15 de marzo. O curso é válido para o exame de Certificación PMP do PMI. Serán 35 horas de sesións de adestramento teórico pero sobre todo práctico.
Segundo informa Vitae acerca da orixe e os obxectivos da actividade, esta ten o seu punto de partida na necesidade de combater con pautas claras e aplicábeis unha das grandes eivas do noso tempo en materia laboral: a gran complexidade que adquire calquera proxecto que acometamos no ámbito das novas tecnoloxías e a innovación en xeral.
A respecto do devandito, a consultora lémbranos as condicións desfavorábeis veñen por factores externos (crise económica, conflitos sociais, cambios políticos, normas e regulamentos cada vez máis restritivos) e tamén por condicionantes internos, por exemplo unha meirande presión para o cumprimento de obxectivos, a procura constante dunha meirande eficiencia (obter máis con menos elementos en xogo), a limitación de recursos ou procura a tempo completo de novos mercados e áreas de negocio.
Tendo en conta todo o que se acaba de sinalar, explica Vitae, “os proxectos non só se volven máis difíciles de levar a cabo, senón tamén máis incertos; sendo a incerteza un factor que pode impactar de maneira moi negativa na consecución do éxito dunha iniciativa empresarial, xa sexa introducindo adiamentos, sobrecustes ou corrupción do alcance”, o que nos obriga a ter en conta, ademais, “a desmotivación dos membros da organización, a insatisfacción por parte dos clientes así como o deterioro da imaxe externa da organización”.
Sexa como sexa, as boas prácticas recoñecidas internacional para a dirección de proxectos, axudan e moito. Por exemplo achegando un meirande nivel de certidume, ao fornecer aos profesionais que desempeñan o rol de directores de proxecto dunha visión máis ampla sobre as iniciativas nas que traballan, precisa para entender como se interrelacionan co resto da organización e axudar na consecución dos obxectivos estratéxicos. Neste senso, Vitae engade que “a certificación PMP acredita a persoas e xera impactos directos de valor nas organizacións”, xa que a dirección eficaz e eficiente de proxectos debe considerase como unha competencia estratéxica das empresas, xa que lles permite competir de maneira máis rendíbel e áxil nos seus mercados, sustentar á organización e responder ás consecuencias dos cambios na contorna de negocio, “axudando a cumprir os obxectos dos proxectos, a ser máis predicíbeis, a optimizar o emprego de recursos da organización e, en xeral, a actuar de maneira proactiva e non reactiva”.
Para quen non o saiba, a PMI (Project Management Institute) é a organización máis recoñecida a nivel internacional na disciplina da dirección de proxectos. Está integrada por máis de 600.000 profesionais de todo o mundo, expertos na xestión de iniciativas, con independencia do tamaño e complexidade das mesmas, en múltiples sectores industriais. Vitae recorda que “as boas prácticas aplicadas e postas en marcha polo PMI son coñecidas, recoñecidas e avaladas por milleiros de profesionais ao longo dunha chea de anos en miles de traballos de todos os ámbitos”.
En termos máis concretos, o PMI acredita aos profesionais na dirección de proxectos co certificado PMP (Project Management Professional), o cal goza dun alto recoñecemento, identificando a quen o posúe como profesional altamente cualificado e demandando, na medida en que aporta un coñecemento moi detallado para a dirección de iniciativas, anticipando problemas, xestionando proactivamente a incertidume e aumentado as probabilidades de éxito nos proxectos.
A persoa encargada de impartir os contidos será Isaac Olalla Del Real, licenciado en Dereito (Universidade Complutense de Madrid) amais de ser un profesional certificado co PMP e co PMI-RMP por parte do Project Management Institute. Trátase dun experto en xestión de iniciativas innovadoras, con máis de 15 anos de experiencia neste ámbito e preto dunha década como formador, impartindo cursos de xestión baseada na metodoloxía PMI. Polas súas actividades de adestramento xa pasaron máis de dous milleiros de persoas, formándose en xestión dunha PMO, en xestión de riscos e en xestión avanzada de proxectos. Ten traballado para Telefónica, Vodafone, Deloitte, IECISA, BT, a DXT, Bankinter, FedEx, o Ministerio de Industria, Votorantim, OHL ou a Xunta de Galicia.

PUBLICIDADE