Vodafone sube en clientes de móbil, banda larga e televisión
venres, 24 de xullo do 2020
A
operadora Vodafone
España presentou este venres 24 de xullo os seus datos de actividade
relativos ao primeiro trimestre de 2020. A conclusión do balance
é que a operadora, malia os efectos adversos que tivo a COVID nunha
manchea de sectores (pero non no das telecomunicacións, en termos
xerais), foi quen de medrar en clientes de móbil (83.000), banda
larga fixa (30.000) e TV (57.000). E fíxoo por cuarto trimestre
consecutivo. En total, chegou aos 2,7 millóns de liñas con datos
ilimitados. Porén, os ingresos por servizo alcanzaron os 920 millóns
de euros no primeiro trimestre, un 6,9% menos debido “á caída en
ingresos por itinerancia-turistas, a suspensións de servizo en
empresas e ás ofertas de datos ilimitados aos clientes durante o
confinamento”.
Segundo
informou a Vodafone, os datos positivos da actividade comercial
reflicten “o impacto das decisións estratéxicas impulsadas para
competir con éxito en todos os segmentos do mercado”, decisións
como o lanzamento de tarifas de datos ilimitados, o despregue
“pioneiro” de 5G en 21 cidades e a inclusión de 5G en todas as
tarifas para particulares e empresas, así como “a aposta por
consolidar o maior catálogo de cinema e series do mercado español”.
Respecto
do nivel de satisfacción dos clientes, a operadora lembra que se
mantén líder neste parámetro, concretamente no relativo ao
segmento residencial, “cunha vantaxe fronte aos seus principais
competidores de +6 puntos en NPS”.