Vodafone xunta forzas co fabricante galego Eezon para impulsar a mobilidade sustentábel

mércores, 7 de xullo do 2021 S. P.

A operadora Vodafone quere apostar pola mobilidade sustentábel e deste compromiso co medio ambiente xorde un acordo acabado de formalizar con Eezon, fabricante galego de motos eléctricas co obxectivo de ser o seu provedor de conectividade e xestión.
Vodafone explica que “as motos eléctricas de dúas rodas traseiras de Eezon están a revolucionar o sector das frotas de servizo e entrega de produtos, sobre todo por ofrecer unha maior capacidade de carga mantendo as vantaxes dunha moto de dúas rodas, pola súa axilidade e porque pode ser estacionada na beirarrúa”.
Este acordo posibilita que a frota de motos eléctricas de Eezon conten coa última tecnoloxía de Vodafone para poder monitorizar os vehículos.
Máis polo miúdo, ao abeiro desta alianza a operadora fornecerá conectividade ao fabricante galego e, tamén, a súa plataforma de xestión de conectividade global. Ademais, Vodafone subministrará un dispositivo que se conecta ao Cambus do vehículo e que extrae a información dos diferentes sensores e compoñentes da moto: parámetros como a localización do vehículo, o consumo, a velocidade, a temperatura do motor e a batería, o estado de batería, a detección de caídas, os ángulos de inclinación, a execución do freo, etc.
Para Vodafone, os vehículos de Eezon destacan non só polas devanditas características, senón tamén por posuír “unha patente propia do seu sistema de balanceo do eixo traseiro, ofrecendo ao usuario unha condución completamente fiábel, áxil, cómoda e segura”, ao que se suma unha tecnoloxía avanzada de estabilidade vertical que ceiba ao condutor de apoiar o pé mesmo con cargas pesadas ou paradas en pendentes. Amais, salienta, as motos Eezon e3 pódense conducir en todo tipo de vías, mesmo en autovías, xa que alcanzan o 90 km/h e teñen unha potencia de 9kw, o que sería equivalente a un 125 cc.
As motos Eezon, fabricadas en España (Vigo) con compoñentes que en máis do 90%, son de orixe estatal e europea, atópanse actualmente en fase de comercialización con entregas previstas para o próximo mes de outubro e unha previsión de alcanzar as 3.000 unidades en 2022.
Na sinatura do acordo participaron José Suárez, director de Desenvolvemento de Negocio de Vodafone España, e máis Pedro Martínez, director executivo de VMS Automotive, a firma galega que produce as motos eléctricas Eezon.

PUBLICIDADE