WhatsApp compartirá información dos seus usuarios con Facebook (agás que se opoñan)

Dende WhatsApp veñen de modificar as súas condicións de servizo, creando certo malestar entre os usuarios que ven con certa desconfianza os pasos que podería dar a ferramenta de mensaxería agora que é propiedade de Facebook, pois aínda que polo momento insisten no feito de que non publicarán nin compartirán os números de WhatsApp con terceiros (incluíndo a Facebook), si admiten que realizarán outras actividades con Facebook para facer seguimento das estatísticas sobre o uso dos seus servizos ou combater así mellor o spam en WhatsApp.
Dende WhatsApp consideran que conectar o número de teléfono do usuarios cos sistemas de Facebook poden axudar a ofrecer mellores suxestións de amizades ou para ofrecer anuncios máis relevantes, e precisamente para regular esta posibilidade é polo que están a realizar certas modificacións nas condicións de uso do servizo.
A intención de WhatsApp é compartir certa información con Facebook e as súas empresas, como sería o número de teléfono rexistrado en WhatsApp e a última vez que se empregou o servizo, ou sexa, información que normalmente compartimos cos nosos contactos, mentres que as comunicacións entre usuarios continuarán a ser totalmente privadas, pero o curioso deste importante cambio é que non se aplicará de xeito forzoso, senón que os usuarios teñen a opción de non permitir compartir a súa información privada con Facebook.
Dende WhatsApp aseguran que o intercambio de datos facilitará unha mellor medición dos usuarios únicos, facilitará combater as mensaxes non solicitadas e o abuso, e conseguirá unhas mellores suxestións de amigos en Facebook e unha publicidade máis relevante, insistindo no feito de que aínda non permiten anuncios tipo banner por parte de terceiros en WhatsApp (aínda que non o desbotan, xa que a aplicación actualmente é de balde) e a explotación comercial que están a explorar consistiría en facilitar a comunicación de comercios e empresas cos seus clientes, por exemplo, para intercambiar información de pedidos, transaccións, citas, entregas, actualizacións de produto... ou sexa, o tipo de comunicacións que actualmente recibimos a través de e-mail ou SMS, e que a través de WhatsApp aínda non contan cunha canle regulada para facer tal.