Witdom encara a súa recta final achegando unha nube segura para a información xenética
venres, 21 de outubro do 2016
Estes
días está entrando na súa recta final o
proxecto Witdom, posto en marcha en xaneiro de 2015 cun
financiamento de máis de catro millóns de euros (dos que de euros
2,8 proviñan da Unión Europea no contexto do programa H2020).
Witdom, como lembraremos, diríxese a avanzar no procesado seguro de
datos xenómicos na nube para facilitar cousas como a detección
temperá de doenzas xenéticas, entre outras aplicacións. Vén da
man dun consorcio internacional coordinado pola empresa de servizos
dixitais Atos España, coa participación de sete socios europeos,
entre os que se atopan a Universidade de Vigo e o Centro Tecnolóxico
Gradiant.
Agora,
co fin de achegar recursos da máxima utilidade que aseguren a
meirande e máis eficaz protección nos datos, os impulsores de
Witdom encaran a demostración dos avances e resultados acadados até
este intre, producindo unha implementación de referencia e,
tamén, dous prototipos nas áreas do procesado privado de datos
xenéticos e a “externalización” segura de servizos
financeiros.
Segundo explica o catedrático da
Universidade de Vigo Fernando Pérez (que lidera a participación da
institución académica xunto co tamén investigador do Grupo de
Procesado de Sinal en Comunicacións Juan Ramón Troncoso), “o
proxecto xa superou dous dos seus fitos principais, producindo en
primeiro lugar unha metodoloxía de elicitado de requisitos
relacionados coa privacidade e seguridade de sistemas externalizados
en contornas non confiábeis e, en segundo lugar, unha arquitectura
segura extremo a extremo, aplicábel a ditas contornas”.
Segundo
fan saber, a maior parte dos avances e resultados xerados ao abeiro
de Witdom demostraranse ao longo do terceiro ano do proxecto.
Xunto
aos representantes no proxecto da empresa Atos e da Universidade de
Vigo, desde o martes 18 ao xoves 20 de outubro, participaron nun
encontro celebrado no campus galego o resto de integrantes do
consorcio internacional: K.U. Leuven (Bélxica), IBM (Suiza),
Fondazione Centro San Raffaele (Italia), XLAB (Eslovenia) e BBVA
(España). Na quinta reunión do consorcio, despois das celebradas en
Madrid, Liubliana, Zurich e Lovaina, as e os representantes dos
socios de Witdom revisaron os avances rexistrados en todos os ámbitos
(xestión, investigación, desenvolvemento, diseminación e
explotación) e decidiron sobre a dirección do proxecto.