Witdom, proxecto de participación galega para fornecer a nube segura
venres, 13 de febreiro do 2015
- Os investigadores Juan Ramón Troncoso e Fernando Pérez
É
a nube un lugar seguro? Esta pregunta vén moi a conto á hora de
falarmos do proxecto Witdom,
empoWering
prIvacy and securiTy in non-trusteD envirOnMents,
unha proposta coordinada pola empresa de servizos dixitais Atos
España coa participación de sete socios europeos, entre os que se
atopan a Universidade de Vigo e o centro tecnolóxico Gradiant. E
indo ao Witdom, con esta idea preténdese buscar mecanismos para
garantir
que os datos dos usuarios estean en todo intre protexidos e que nin
tan sequera o provedor da nube os poida coñecer. Deste xeito, a
privacidade, a seguridade e a integridade da información amoreada na
nube estará sempre resgardada.
Segundo
informa a Universidade de Vigo, o orzamento do proxecto ascende a
case catro millóns de euros, dos que a Comisión Europea financia
uns 2,8 millóns no contexto do programa H2020. Witdom céntrase
(máis polo miúdo) no procesado seguro de datos xenómicos na nube,
como base do avance na detección temperá de enfermidades xenéticas,
así como na análise de datos bancarios. “Tanto os datos xenómicos
coma os bancarios son especialmente sensíbeis e a súa axeitada
protección en contornas non confiábeis é crucial para mellorar a
privacidade dos usuarios e eliminar a necesidade de confianza cega
nos provedores de servizos”, explica o catedrático do Departamento
de Teoría do Sinal e Comunicacións da Universidade de Vigo,
Fernando Pérez, que xunto ao tamén investigador do Grupo de
Procesado de Sinal en Comunicacións, Juan Ramón Troncoso, lidera a
participación da Universidade de Vigo neste proxecto de tres anos,
no que o Centro Tecnolóxico de Telecomunicacións de Galicia,
Gradiant, participa como entidade asociada á institución académica
viguesa, achegando a súa experiencia no deseño de sistemas na nube
e de ferramentas de comunicacións anónimas e análises de
privacidade.
Pola
súa banda, a Universidade asume a coordinación científico-técnica
do proxecto, ademais de liderar o paquete de traballo de
investigación fundamental en procesado seguro de datos e sinais. A
Universidade de Lovaina (Bélxica), grandes empresas como IBM
(Suíza), PEME encamiñadas ao desenvolvemento de solucións seguras
como XLAB (Eslovenia) e usuarios finais aos que van orientadas as
solucións e os casos de uso que Witdom atende, como o Centro de
Investigación Xenómica de la Fondazione Centro San Raffaele
(Italia) e o BBVA (España), completan o consorcio liderado
por Atos España.
Para rematar,
cómpre subliñar que para conseguir que o provedor da nube opere
sobre os datos dos e das usuarias sen que estes deixen en ningún
intre de estar cifrados, Witdom céntrase en desenvolver tecnoloxías
eficientes de procesado con datos cifrados, amais de introducir
técnicas de protección da privacidade dos individuos que acceden ao
servizo e métodos de análise e verificación do axeitado
funcionamento dos sistemas actuais e futuros.