Zendal, FINSA, Televés e Vodafone pechan fileiras a prol do hub galego DATAlife
mércores, 28 de xullo do 2021
O
Grupo Zendal, FINSA, Televés e a operadora Vodafone, as catro
empresas tractoras socias de DATAlife
Hub de Innovación Dixital (DIH, nas súas siglas en inglés),
veñen de xuntar novos esforzos para impulsar a estratexia de
transformación tecnolóxica deste hub galego, que pretende
beneficiar os procesos dunhas 3.700 pemes galegas dun amplo abano de
sectores produtivos, que van dende o eixe agro-mar-alimentación até
a biotecnoloxía, pasando polo forestal e a saúde.
Representantes
das catro compañías mantiveron un encontro este 27 de xullo,
presidido polo principal responsábel do hub, Pablo Álvarez
Freire, tamén director xeneral adxunto de Grupo Zendal, na sede do
grupo biotecnológico, no Porriño, que exerce como líder do
proxecto DATAlife.
Como
lembraremos, os socios de DATAlife son cinco clústers (o Clúster
Tecnolóxico Empresarial das Ciencias da Vida -Bioga-, o Clúster da
Acuicultura de Galicia -CA-, o Clúster da Madeira e do Deseño de
Galicia -CMD-, o Clúster Saúde de Galicia e o Clúster TIC
Galicia); as empresas Grupo Zendal, FINSA, Televés e Vodafone; cinco
centros tecnolóxicos (Energylab, Gradiant, ANFACO-CECOPESCA, o
Centro de Supercomputación de Galicia -CESGA- e o Centro Tecnolóxico
de Investigación Multisectoria, o CETIM) e o sistema universitario
da nosa terra (a Universidade de Santiago de Compostela, a
Universidade de Vigo e o FEUGA).
O
encontro das catro firmas tractoras de DATAlife serviu para
“reafirmar o seu compromiso a prol da dixitalización das pemes
galegas dos sectores nos que traballa o DIH”, apuntou o presidente
do hub, entidade que xa está a captar as necesidades das
pequenas e medianas empresas e buscando solucións de dixitalización
adaptadas a cada proxecto. “O reto é ambicioso”, lembrou Pablo
Álvarez Freire, quen destacou o papel que deben xogar as ditas
compañías referenciais neste proxecto, “fomentando o medre e o
desenvolvemento económico e xerando un efecto multiplicador e de
innovación sobre a actividade produtiva na que desenvolven o seu
quefacer”.
O
encontro no Porriño, ao que asistiu o equipo de xestión de DATAlife
liderado por Lucía Castro, tamén serviu para programar o novo
curso, para facer balance das actividades impulsadas polo DIH e para
a actualización de servizos, entre os que está o asesoramento en
transformación dixital, o acceso a financiamento e a incorporación
de tecnoloxías disruptivas. Entre Grupo Zendal, Finsa, Televés e
Vodafone produciuse un debate sobre os retos tecnolóxicos das
empresas tractoras e as súas cadeas de valor. As catro compañías
coincidiron en apostar “ao unísono para que a innovación dixital
e o desenvolvemento vinculado a tecnoloxías como a Intelixencia
Artificial e o Big Data permitann que as cadeas de valor
Agro-Mar-Alimentación, Biotecnoloxía, Forestal-Madeira e
Saúde-Coidados sirvan de motor para mobilizar a todo o tecido
produtivo e, fundamentalmente, ás pemes”.