A FIC acolle este mes un curso sobre técnicas para mellorar ao máximo a calidade do software
mércores, 5 de outubro do 2011
- Exterior do CITIC, organizador do evento formativo
O Centro de Investigación en TIC (CITIC) vai
organizar este mes de outubro unha actividade formativa destinada a fortalecer
aos nosos estudantes e profesionais no complexo labor de pulir e perfeccionar
os programas informáticos nos que estean a traballar. O curso
en cuestión, que será impartido o día 25 na Facultade de Informática da
Coruña, preséntase baixo o seguinte título: Xestión
de probas en desenvolvemento de software. A actividade vai dirixida a tódolos
profesionais, investigadores e estudantes interesados en mellorar até onde sexa
posíbel o control sobre os seus produtos.
A cita, de 9.30 a 14.00 horas, insírese no
Plan de Formación continua que se está a levar a cabo no CITIC, dirixido a
promover a transferencia de coñecemento aos sectores público e empresarial. “Como parte desta experiencia”, sinalan
os organizadores desta actividade, “e co
fin de acadar meirande transmisión de coñecemento, exporanse ante tódolos
asistentes a formulación e reformulación de enfoques, marcos e paradigmas de
desenvolvemento cuxo obxectivo último é sempre a construción de software da
mellor calidade”. Xa nun plano máis
específico preténdese con esta acción formativa lograr que os participantes
dominen o uso de diversas técnicas de proba, métricas de eficacia e ferramentas
de todo índole encamiñadas a asegurar a máxima calidade. As persoas que queiran
inscribirse deberán pórse en contacto co CITIC antes do 20 de outubro, a través
da conta de correo promocion@citic-research.org.