A Preincubadora da Tecnópole, máis TIC ca nunca tras recibir aos gañadores ourensáns de INCUVI-Emprende
xoves, 26 de marzo do 2015
A Tecnópole
(Parque Tecnolóxico de Galicia) recibiu esta semana aos gañadores
na cuarta edición dos Premios INCUVI Emprende que darán impulso
ás súas iniciativas nos niños e na sala de coworking do
complexo empresarial ourensán. Trátase
das novas empresas iBeeAgro, MeigaLabs e Traster, os proxectos
vencedores xunto con Consultoría Deportiva da cuarta convocatoria
dos ditos galardóns no Campus de Ourense. Institucións e
entidades colaboradoras acompañaron aos futuros empresarios nunha
visita polas instalacións da Preincubadora da Tecnópole que
empregarán durante o vindeiro ano a custe cero para “envolver aos
estudantes nunha contorna que lles permita dar forma á súa idea e
saír adiante”, como salientou o reitor da Universidade de Vigo,
Salustiano Mato.
Segundo informa a
institución académica, xunto aos devanditos locais os gañadores
recibirán un teléfono fixo e móbil, un dispositivo de web-TV a
cargo de Blusens, un bono formación de 1.000 euros para cada un dos
compoñentes dos proxectos por cortesía de Abanca e a asistencia de
balde a cursos e sesións organizados polas entidades patrocinadoras,
ademais do seu asesoramento e experiencia “para que nun mundo
apocalíptico no que todo o mundo di que non cando queres montar algo
haxa xente con iniciativa e ilusión”, como asegurou Lois Babarro,
presidente de AJE Ourense. Xunto con el tamén estiveron presentes na
recepción representantes da Cámara de Comercio, da Confederación
de Empresarios e de Expourense.
Os proxectos
Javier Pesado e Sergio
Eiriz son os promotores de iBeeAgro, un sistema de seguimento e
control para acadar unha agricultura máis eficiente e sustentábel
nun intre no que a maioría das explotacións non dispoñen de
información dos seus cultivos e as decisións tómanse de forma
“correctiva” elevando os custes de produción. O proxecto
abrangue un sistema que, a través de redes sen fíos de sensores,
captura datos e os computa na nube para poder xestionar cultivos de
calquera tamaño. O sistema é accesíbel mediante unha plataforma
web na que se pode entrar a través de calquera dispositivo con
conexión a Internet. iBeeAgro permite consultar o estado dos
cultivos ou configurar alarmas, engadindo un caderno de explotación
ou xerar e compartir en rede modelos de predición.
Outro dos niños da
incubadora da Tecnópole está xa ocupada por José Antonio Tesouro,
Xabier Losada e Javier López Camba, artífices de MeigaLabs, un
estudo de desenvolvemento de xogos e aplicacións para dispositivos
móbiles que
xa ten o seu primeiro produto no mercado, Time Pirates, no
que o xogador é un pirata que ten que loitar contra os soldados do
rei nunha contorna en 3D. A idea destes emprendedores é aproveitar o
aumento do uso destes dispositivos por parte do público, que cada
vez máis os emprega non soamente para traballo, senón tamén para o
seu tempo de lecer.
Outro dos proxectos vén
da man de Jairo Carrera, Nicolás Álvarez, Daniel Rodríguez e Iván
Estévez, os responsábeis de Traster, unha plataforma dirixida a
poñer en contacto a persoas que necesitan arranxar, pór a punto ou
revisar un ordenador ou solucións tecnolóxicas específicas con
profesionais cualificados. A idea, din, abrollou da “necesidade que
observamos de atopar xente que resolva problemas concretos, xa que o
ámbito tecnolóxico é moi amplo e está en constante actualización,
polo que é moi difícil que alguén saiba de todo”.
Pola súa banda, Carlos
Gómez e Alejandro Rodríguez porán en marcha unha consultoría
deportiva para “facer fronte ás necesidades dos distintos entes
públicos e privados de dar resposta e solución” nun sector “en
continua transformación e que ofrece grandes oportunidades de
crecemento económico e social”.