A web de Baía Edicións permite que nos asomemos ao miolo dos seus libros
mércores, 23 de marzo do 2011
A empresa galega
Baía Edicións vén de introducir unha serie de melloras na súa face web. Ás
incorporacións precisas para achegarlles aos internautas visualizacións do
interior dos libros do seu catálogo (co fin de axudar aos usuarios da Rede a
facerse unha idea clara do conxunto total da obra, case igualiño que se
estiveran na libraría remexendo e esculcando nos volumes), incorporacións
postas en marcha ao longo deste ano, hai que sumarlle agora un novo reclamo
para os seareiros da lectura en galego. Falamos da posta en funcionamento, na sección de
narrativa da web de Baía Edicións, dun servizo que nos permite
introducírmonos nun capítulo de cada un dos libros de narrativa que a editorial
ten habilitados en liña.
O obxectivo é
semellante ao anterior e comparte certos elementos coa posibilidade ofrecida
por algunhas iniciativas web de ofrecer escoitas de obras musicais antes de
compralas. A novidade ten un gran interese para calquera persoa que estea
afeita á lectura e non require grandes coñecementos informáticos para o seu
uso: simplemente facer clic onde se nos ofrece a lectura do capítulo, que de
contado teremos na pantalla en formato pdf.