Arteixo Telecom confirma viabilidade para saír da situación de concurso
venres, 2 de maio do 2014
Arteixo Telecom semella
ter finalmente futuro, logo de
ter afrontado importantes problemas financeiros (declarouse en
concurso de acredores e suspensión de pagos) e de que os
traballadores da propia empresa se puxeran en pé de guerra para
pedir o mantemento dos seus postos e da propia compañía TIC galega.
Pois ben, uns e outros levan anos loitando pola supervivencia da
empresa e hai sinais que indican que pode ser posíbel. Arteixo
Telecom, firma especializada en desenvolvemento (propio) de
tecnoloxías de comunicación, vén de informar que
xa acadou acredores de abondo para apoiar o seu plan de viabilidade
e despedirse definitivamente da focha do concurso.
Máis en detalle, Arteixo
Telecom conseguiu máis da metade dos apoios, porcentaxe que podería
incrementarse se os provedores de fóra de España dan superado
certos atrancos legais para xuntar forzas arredor do novo plan. A
empresa con sede nas Pontes, que arestora ten 140 empregados dos 200
que chegou ter antes da crise, agradeceu a confianza depositada nela
agora por parte dun importante número de firmas subministradoras e
de entidades bancarias, entre as que se contan NCG, Sabadell,
Catalunya Banc, Banco Popular ou Santander. Segundo informou Javier
Grandal, director financeiro da empresa galega, a partir deste intre
o importante é xuntar e afianzar o financiamento preciso “para
poder acometer as previsións reflectidas no plan de viabilidade, e
estar preparados para superar as devanditas previsións para cando o
mercado da electrónica industrial se recupere”.