BlaBlaCar xa ten 139.000 usuarios galegos
xoves, 6 de outubro do 2016
Os responsábeis do
servizo BlaBlaCar (a
plataforma colaborativa para compartir gastos de viaxe) veñen de
facer un novo informe sobre o seu “estado de saúde” na nosa
terra, un reconto de cifras que
complementa o publicado este mesmo ano pola mesma empresa e con
semellantes obxectivos, do que dimos conta en Código Cero.
Segundo se fai saber na nova investigación, a plataforma xa ten
139.000 usuarios galegos, aproximadamente 14.000 máis ca na pasada
primavera. Isto guinda unha taxa de medre do 12%.
A clave deste crecemento
estivo no verán, a época do ano na que con toda probabilidade máis
se viaxa. Segundo sinalan dende BlaBlaCar, ao longo dos meses de
xuño, xullo, agosto e setembro, “galegas e galegos de todas idades
puxéronse en contacto a través da rede social para compartiren os
gastos dos seus desprazamentos”.
Respecto das cifras
estatais, a comunidade xa está integrada por 3 millóns en usuarios
en España. Nos 22 países nos que ten presenza acadou 35 millóns de
membros.
Por provincias galegas, A
Coruña e Ourense foron as que contaron con meirande número de
usuarios, seguidas de Lugo e Pontevedra. Segundo indican os
impulsores deste servizo, “todas elas experimentación crecementos
salientábeis ao longo do último ano, con aumentos de entre o 20% e
o 40% no seu número de usuarios”.
Con respecto á propia
comunidade, as rutas máis habituais en 2016 foron A Coruña-Ferrol,
Pontevedra-Vigo e A Coruña-Santiago. A nivel estatal, o traxecto
máis habitual foi, por sexto ano consecutivo, Madrid-Valencia. “A
capital, como centro xeográfico da península, é orixe e destino de
gran parte das rutas máis habituais”, explican.