BlaBlaCar suma máis de 125.000 usuarios en Galicia

A popular plataforma para compartir gastos de viaxe, BlaBlaCar, está a organizar unha serie de encontros entre os seus usuarios por 10 cidades españolas chamado BlaBlaTour 2016, e tras pasar por Salamanca e Madrid, recalou en Santiago de Compostela, e aproveitaron a ocasión para dar conta dalgúns datos da compañía relativos a Galicia.
Así sabemos que en Galicia xa hai máis de 125.000 usuarios de BlaBlaCar, sendo a provincia da Coruña a que recibiu máis viaxes (o 34,4%) durante o primeiro trimestre do ano, superando a Ourense (29%), Lugo (19,9%) e Pontevedra (16%), relación que non vai na mesma orde que o número de usuarios rexistrados, onde Ourense vai en cabeza con 42.744 usuarios, seguida por A Coruña (40,589), Lugo (24.425) e Pontevedra (17.242).
Dende BlaBlaCar destacan o feito de que practicamente hai usuarios en todas as localidades de cada provincia, o que o country manager para BlaBlaCar España e Portugal, Jaime Rodríguez de Santiago, asegura que é consecuencia de que “moitos dos traxectos realizados unen puntos da Comunidade que só poden realizarse de forma directa en coche”. Como exemplo engade que “os 10 traxectos máis habituais concertados a través de BlaBlaCar só supoñen o 2% das viaxes que se publican na plataforma e é habitual, en Galicia, atopar viaxes entre Lalín e Madrid, Chantada e Pontevedra ou A Coruña e Cáceres”. Precisamente nesta liña Madrid sería a cidade de fóra de Galicia máis visitada polos galegos.
BlaBlaCar leva 5 anos en activo en España, e a compañía advirte que neste tempo medrou a idade media dos usuarios, pasando dos 24 en 2010 aos 31 anos en 2015. Detallan que actualmente o 26% dos usuarios de BlaBlaCar teñen entre 25 e 29 anos, outro 26% entre 30 e 39 anos, destacándose o feito de que o 71% dos usuarios teñen traballo, o 13% son estudantes, o 3% son xubilados e o 13% está en paro, sendo especialmente relevante este último grupo, que en BlaBlaCar parece ter atopar un alivio económico aos seus desprazamentos.