FOGA dixitaliza valiosos fondos do Arquivo Diocesano de Lugo
martes, 12 de xaneiro do 2016
A empresa galega FOGA
chegou recentemente a un acordo cos responsábeis do Arquivo
Diocesano de Lugo para o inventariado, ordenación e catalogación
do seu Fondo de Ordes Sacras. O
proxecto foi dado a coñecer estes días, trala entrega da primeira
fase dos traballos de dixitalización, un acto no que
participaron José Mario Vázquez, vigairo xeral da Diocese de Lugo,
Óscar González, director do Arquivo Diocesano, amais dos
profesionais da propia firma con sede en Compostela. O obxectivo
destes traballos de migración a formato dixital é conservar de
maneira axeitada o patrimonio (fondos documentais) da dita
institución eclesiástica, e incentivar aínda máis a súa consulta
e difusión (xa de por si importantes, dado o seu “prestixio e
calidade”).
As tarefas céntranse na
adecuación e dixitalización dos fotogramas dos fondos,
concretamente dos libros de Fábrica, Bautismos, Defuncións,
Matrimonio e Varios. A maiores, e segundo informan dende FOGA, a masa
documental destes arquivos (do mesmo xeito que acontece cos Arquivos
Capitulares) pode agruparse en tres divisións: Goberno, Provisorato
e Administración Xeral, que almacenan os documentos producidos e
recibidos como resultado das súas actividades. “O Arquivo
Diocesano de Lugo”, engaden dende a empresa compostelá, “é un
arquivo vivo, xa que recibe documentación a diario e, por iso
resulta preciso distinguir entre os documentos que pertencen ao seu
fondo histórico e aqueles que integran o seu fondo administrativo”.
Co obxectivo de “permitir
a consulta desta tipoloxía de fondos por parte de investigadores e
usuarios en xeral”, a institución aborda a organización e
dixitalización do fondo de Ordes Sacras, pertencentes á serie
documental do Clero Secular Diocesano, cunha cronoloxía que abrangue
desde 1652 a 1996. Estes fondos recollen a relación de todos os
candidatos ordenados de prima clerical tonsura, ordes menores ou
graos, epístola, evanxeo e misa. Ademais, permiten establecer unha
relación cos mazos de Patrimonio e cos mazos de Ordes.
“Dada a súa natureza”,
engade FOGA, “trátase dun proxecto de longo alcance que deberá
realizarse en sucesivas fases debido á complexidade dos traballos a
realizar, non só polo elevado número de rexistros que contén cada
un dos mazos de documentación, senón porque se trata dun proceso
laborioso e minucioso de recollida de datos para a catalogación,
como o detalle do nome da persoa que se ordena, o ano da súa
ordenación, a súa procedencia e o grao no cal se ordena”.
O proceso de captura
dixital realizarase no Laboratorio de FOGA e incluirá outros
servizos asociados como a recollida e traslado dos documentos, a
resolución de incidencias e o control da calidade.