Galiciencia comeza cunha exposición récord de 64 proxectos

Finalmente comeza hoxe a edición 2014 de Galiciencia, un cita multitudinaria para fomentar o maxín creativo e investigador das nosas rapazas e rapaces e que este ano achega a previsión de acubillar máis de 2.000 persoas, entre hoxe mércores e venres 21 na Tecnópole de Ourense. Asemade, a organización da feira (unha das máis importantes feiras científicas de todo o Estado, recoñecida pola FECYT como actividade referente da Semana da Ciencia en España) conseguiu que nesta convocatoria (a novena xa) se batese o récord de participación de proxectos: un total de 64.
Segundo engaden os responsábeis de Galiciencia (Tecnópole-Parque Tecnolóxico de Galicia), esta desenvolverase nunha carpa na que 44 equipos de Secundaria e FP amosarán ao público os seus proxectos científicos e de innovación. Este ano, como novidade, a feira conta cunha sección especial na que expoñerán 20 equipos de Primaria. “Os equipos”, informa a Tecnópole, “recibirán a visita de grupos escolares de toda Galicia, ás que se sumarán as persoas que acudan pola súa conta, xa que a feira é de entrada libre para particulares e familias, coa vantaxe engadida de que este ano se amplía o horario da exposición de proxectos en dúas horas, de maneira que ficará aberta de 10 a 13 horas pola mañá e de 15 a 18 horas pola tarde”.
Na edición 2014 que comeza hoxe, a representación máis numerosa na exposición de proxectos procede dos colexios de Ourense e Pereiro de Aguiar, cun total de 27 equipos defendendo as súas investigacións e inventos, entre os que se atopan os dos alumnos das Aulas Tecnópole e do campamento tecnolóxico de verán da Tecnópole. A eles súmanse 15 de Vigo, 5 de Pontevedra, 4 de Cambre, 3 de Santiago de Compostela, 2 de Ferrol, 2 de San Sadurniño, 1 de Ortigueira, 1 de Teo e 4 de Barcelona.
Entre outras moitas cousas, Galiciencia acollerá estes días actividades de planetario e robótica Lego para os máis pequenos, e un obradoiro de tecnoloxías punteiras para os maiores, xunto cunha charla sobre a relación entre a ciencia e a música que poderá visualizarse en liña desde calquera centro educativo de Galicia e para a que se prevé un seguimento de arredor de 1.000 estudantes, “o que eleva o público total da Galiciencia a máis de 3.000 persoas”, engade a organización.
Durante a clausura, ademais da entrega de premios aos mellores proxectos por categorías, darase a coñecer tamén o gañador do concurso de fotografía científica convocado no marco deste certame.