Gradiant amosa en Vigo as potencialidades do seu sistema para contabilizar persoas de xeito automático
luns, 12 de novembro do 2012
- Os investigadores de Gradiant, Daniel Pereira, á esquerda, e Iago Rodríguez, á dereita
O centro galego Gradiant
(Centro Tecnolóxico de Telecomunicacións de Galicia) está a
presentar estes días en Vigo unha tecnoloxía de seu con especial
potencialidade para incrementar e rendibilizar as medidas seguimento
e control dos fluxos de persoas en inmobles e recintos, por moi
multitudinarios que sexan eses fluxos. A tecnoloxía en cuestión
chámase sistema de Conteo Automático de Persoas e vai ser amosada
en detalle no Centro Social Novacaixagalicia de Vigo. O recurso
instalarase no auditorio deste edificio co fin de permitir o mellor
achegamento ás súas moitas aplicacións: a través da súa posta en
práctica real. Segundo informa Gradiant, varios investigadores do
centro vigués estarán presentes para explicar o sistema a tódolos
asistentes.
Sinalar que o Centro Social
Novacaixagalicia acolle estes días a nova edición das JAI, as
Xornadas de Automatización Industrial, nas que colabora de xeito directo o centro galego.
Segundo avanzan fontes de Gradiant, o
sistema automático de cálculo de persoas, proxecto interno do
centro galego de I+D, está baseado nun sensor de profundidade.
Trátase do mesmo sensor que emprega o Kinect, que na súa orixe
desenvolveuse para xogar á videoconsola Xbox. “Este tipo de sensores”, explican,
“fornecen imaxes con información da distancia á que se atopan
os obxectos presentes na escena”. O sistema que usa Gradiant é un sensor de fondura que xera visualizacións das persoas que pasan
baixo o seu eido de visión, a través de infravermellos e
determinando cales son as rexións da imaxe que se corresponden coas
cabezas desas persoas, para facer desta maneira o cómputo.
Como
avanzamos, unha das moitas aplicacións posíbeis desta tecnoloxía
céntrase no eido da seguridade en edificios e recintos, achegándose
moita máis fiabilidade ca no caso das cámaras de tipo convencional,
xa que con estes novos recursos, a través dos sensores incluídos,
os cambios na iluminación teñen menor incidencia, ao igual que a
falta de luz (funcionan na escuridade). “O sistema”,
informa Gradiant, podería empregarse “nun transporte público
para realizar o cálculo de pasaxeiros que se baixan nunha
determinada parada de metro; pudendo usarse a información obtida
para deseñar mellores rutas ou optimizar os servizos dispoñibles”.
Tamén amosa especial potencialidade para computar as persoas que entran ou saen dun local ou centro comercial, dun edificio público, etc. En base a iso, poderían determinarse as horas de meirande fluxo e procurar os
horarios máis axeitados para ese pico na afluencia de persoas.