Nacións Unidas fomenta a creación de videoxogos para resolver conflitos

Calquera tema que se nos ocorra é susceptíbel de servir de alicerce a un videoxogo, mesmo a paz. Sobre todo (con máis razón) se do que se trata é de promovela, divulgala e levar a súa mensaxe até o último neno do país máis afastado. Nesta liña situouse Nacións Unidas a través dos seus programas para desenvolvemento PNUD e a Alianza de Civilizacións (UNAOC), que están a convocar a deseñadores e programadores de todo o mundo para dar forma a PEACEapp, un certame internacional para o lanzamento de xogos e aplicacións que contribúan a incrementar a comunicación entre países e diferentes culturas e, en última instancia, á resolución de conflitos. A xuízo da ONU, “os videoxogos ofrecen un medio creativo que as persoas de todo mundo sexan quen de imaxinar un futuro xuntos e en paz”.
Máis polo miúdo, a iniciativa encamíñase a loitar contra ideas preconcibidas, prexuízos e toda forma latente de discriminación social, racial, relixiosa ou económica. A proposta apóiase no seguinte: os xogos, neste senso, teñen potencial para servir de contrapartida positiva ao labor dos medios de comunicación, agás contadas excepcións culpábeis (moi culpábeis) da materialización deses prexuízos e estereotipos.
O concurso PEACEapp admite propostas de xogos en desenvolvemento ou xa lanzados até o 15 de outubro. O seu xurado internacional, que conta coa presenza de persoeiros como Ethan Zuckermar -director do Center for Civic Media do MIT e fundador de Global Voices-, seleccionará cinco gañadores. Deles, tres deberán estar xa en activo e dous en fase de creación. As iniciativas xa operativas recibirán un premio de 5.000 dólares e as outras dúas asesoría por parte dun panel de especialistas. A maiores, un membro de cada un do cinco equipos será convidado á conferencia Construír a Paz, que se celebrará en abril de 2015 en Chipre. Para participar no certame, só se nos esixe ser maiores de 13 anos. Os xogos descargábeis de balde e multiplataforma serán os máis susceptíbeis de seren premiados.