Netflix supera os 20 millóns de subscriptores

xoves, 27 de xaneiro do 2011 Marcus Fernández

No debate suscitado na Rede sobre a chamada Lei Sinde non son poucos os que comentaban que en vez de aprobar prohibicións, resultaba máis axeitado potenciar alternativas legais ás descargas, como está a ser Spotify para a música e que coas series de televisión e o cine podería ser Netflix (con tarifas de 7,99 dólares/mes para un acceso ilimitado mediante streaming aos seus contidos nos EE.UU. e en Canadá). Segundo parece, o atractivo desta oferta audiovisual resulta innegable, e agora ratifícano os resultados de Netflix do último trimestre de 2010 (descargables en formato PDF), nos que a compañía chegou aos 20,01 millóns de subscritores (7,7 adquiridos no último ano, e 3,08 no último trimestre), uns ingresos de 596 millóns de dólares e uns beneficios por acción de 0,87 dólares.
En vista do éxito de Netflix en Norteamérica non sorprende que a compañía pretenda desembarcar en Europa en 2011, aínda que certos rumores apuntan a que España podería quedar fóra desta interesante iniciativa porque os dereitos de autor custarían aquí 2 ou 3 veces máis que nos países do contorno (segundo comentan na páxina web da Asociación de Internautas).
Cómpre destacar que o éxito de Netflix non está só no seu prezo e o seu inmenso catálogo de contidos, senón tamén na súa aposta multiplataforma, xa que os seus subscritores poden acceder ao servizo de vídeo mediante streaming dende o ordenador, en distintos dispositivos móbiles (coma o iPhone, o iPad e os terminais con Windows Phone 7), televisores con acceso a Internet de distintos fabricantes, reprodutores de Blu-ray conectados e incluso dende calquera das 3 consolas de videoxogos actuais, polo que resulta moi doado consumir os seus contidos no salón ou en mobilidade. Tamén están a traballar en integrar Netflix con Facebook e, posiblemente, facer compatible o servizo co Apple TV.
Pero este servizo non está ausente de problemas, pois as operadoras de telecomunicacións parecen querer recibir parte do pastel de Netflix, o que serve de exemplo da necesidade de que os organismos reguladores protexan a neutralidade de rede, para evitar que negocios lexítimos e interesantes non teñan atrancos para chegar ao seu público.

PUBLICIDADE