O Culturgal máis tecnolóxico acubillou máis de 14.000 visitantes e 40 actividades
luns, 2 de decembro do 2013
Finalmente desenvolveuse esta fin de semana o salón
da cultura galega Culturgal
e, logo da
marea de xente que acudiu ao Pazo da Cultura de Pontevedra durante os
tres días nos que se desenvolveu a feira (arredor de 15.000
persoas), unha das conclusións máis claras que se pode tirar do alí
presentado e debullado polas empresas do sector é a seguinte: a
crise e a falta de recursos institucionais están a xerar unha
auténtica revolución nos formatos elixidos, nas metodoloxías de
creación e nos xeitos de distribuír. Isto tradúcese nun proceso
que nos toca de preto: o emprego cada vez máis amplo dos novos
servizos, aparellos e aplicacións dixitais, tanto para crear como
para buscar apoios como para chegar ao público. En definitiva,
quedou claro no evento (que acubillou máis de corenta actividades)
que a cultura galega está a subir un novo chanzo en materia de
enxeño e capacidade de reinventarse a si mesma.
A idea básica é sorprender e afianzarse no futuro,
e non só botando man do novo (a Rede e os trebellos e as súas
cousas) senón tamén do antigo. Nisto baséanse por exemplo as
xornadas Estruming Days, uns encontros que se desenvolveron en
parte dentro do marco do Culturgal, achegando
o seu espírito a unha importante serie de actividades, e de
cuxos obxectivos xa falamos polo miúdo en Código Cero. A
iniciativa, convocada por vez primeira este ano, tivo a súa orixe no
labor xerado polo equipo organizador (Anias Xestión Sociocultural)
destes eventos coa mancomunidade de montes do Salgueiral, en
Pontevedra. A finalidade foi ver até onde se pode chegar mesturando
TIC e rural galego, botando man da experiencia desta mancomunidade,
que atopou interesantes analoxías entre o xeito ancestral de
xestionar o monte galego e as novas formas de crear, compartir e
divulgar coñecemento e tecnoloxía. En definitiva, todo un sopro de
ar fresco para as nosas industriais culturais e para os métodos
xerais de acceso ao coñecemento.
De novas canles e xeitos de informar tamén falaron
os integrantes do medio dixital galego Disquecool, que argallou unha
innovadora proposta de promoción en Culturgal, máis polo miúdo
a través da iniciativa Off Culturgal. En detalle, tratouse de xuntar
a nove profesionais para que amosasen as súas ideas e proxectos
creativos: foron 9 participantes e 9 minutos cada intervención (6 de
intervención e 3 de preguntas do público), co xornalista Luís
Pardo como mestre de cerimonias.
Tamén apostou pola novidade nas formas a empresa
galega Ganapán, que aproveitou a feira para darse a coñecer
mediante o desenvolvemento de auditorías de comunicación
instantáneas e gratuítas. Máis en detalle, o que fixeron os
responsábeis desta empresa dende o seu stand foi guiar a
artistas e empresas culturais no forxado da súa presenta na Rede, a
través de citas rápidas ao estilo “dos encontros exprés das
películas”. A iniciativa, contounos
a empresa días antes do Culturgal, “presenta a tres expertos
sentados á mesa cun temporizador, ofrecendo roldas de asesoramento
aos interesados de cinco minutos por quenda”. A idea foi fornecer
pautas a seguir para que os negocios, artistas e creadores atopen as
vías correctas para darse a coñecer a través da mercadotecnia en
liña a baixo custo.
Pola súa parte, segundo nos contan dende Sermos
Galiza, a Fundación Novoneyra deu a coñecer a plataforma de
crowdfunding literario en liña ithcrowfunding.org e a
Coordinadora de Traballadores/as de Normalización Lingüística
amosou as importantes e interesantes funcionalidades (sobre todo de
cara ao Nadal que se nos bota enriba) da súa Guía
de agasallos en galego en liña. Tamén
se deron a coñecer webseries
no Espazo Cinema e, como
avanzamos os días pasados, a
revista Luzes, acabada de saír do prelo e con importantes
ramificacións no eido dixital (terá versión para tablets, entre
outras cousas). Igualmente, presentouse a televisión dixital Galiza
Ano Cero, proxecto audiovisual independente que abrolla dunha
comunidade aberta e participativa, e que se estreou oficialmente na
Internet este verán pasado, logo dun proceso de recadación de
apoios entre a comunidade redeira galega. En Culturgal
lembráronse as características de seu: estamos ante unha canle
galega de TV en liña, sen arela de lucro, independente e que se
constrúe entre todas e todos, coma se dunha comunidade 2.0 libre se
tratase, todas/os somos potencialmente espectadores, creadores e
pequenos produtores.