O programa europeo FI-PPP destina 80 millóns a iniciativas que liguen Internet a todos os ámbitos sociais
xoves, 2 de outubro do 2014
Este mércores de outubro
desenvolveuse
de xeito presencial e telemático a xornada Oportunidades de
financiamento para PEME na Internet do
futuro, unha actividade que como o seu propio nome indica,
dirixiuse a amosar en detalle as cousas que podemos facer e as
xanelas que podemos abrir para acadarmos fortalecemento económico
para as nosas iniciativas TIC. A xornada, que veu da man da Axencia
Galega de Innovación (GAIN), tirou abaixo límites espaciais:
desenvolveuse presencialmente en Santiago e a través de
videoconferencia para as empresas das nosas restantes cidades (por
exemplo as da Tecnópole de Ourense). As sesións serviron, máis
polo miúdo, para presentar as axudas da Unión Europea para as PEME
comprometidas coa construción da Rede que vén. Informouse, polo
tanto, dos requisitos e condicións para acceder aos incentivos.
Polo tanto, fíxose
fincapé no programa europeo Future Internet Public Private
Partnership (FI-PPP), que acubilla as diferentes liñas de axuda
que se están a presentar estes meses e que pon a disposición das
PEME e emprendedores 80 millóns de euros para o desenvolvemento de
produtos e servizos innovadores empregando a tecnoloxía despregada
nas anteriores fases do programa. O programa fornece distintas
vertentes temáticas: eSaúde, enerxía e medio ambiente, Cidades
Intelixentes, etc.
A xornada contou coa
presenza do director da Axencia Galega de Innovación, Manuel Varela
Rey, quen salientou as posibilidades que ofrece a Estratexia de
Especialización Intelixente de Galicia – RIS3 para que tiremos
proveito das oportunidades de financiamento que ofrece Europa. Varela
engadiu que a RIS3 “define un marco de actuación no que as PEME
innovadoras, o emprendemento e a transferencia de resultados ao
tecido empresarial son eixos centrais da súa estrutura”. Asemade,
valorou positivamente as oportunidades do programa europeo FI-PPP,
que ten aberta a súa terceira fase achegando 80 millóns de euros
para apoiar iniciativas que fomenten a competitividade da industria
de desenvolvedores de software e potencien as ligazóns entre
Internet, servizos innovadores e aplicacións públicas e sociais.
Ao fío disto, Varela
fixo saber que a axencia que dirixe puxo en marcha un servizo de
asesoramento específico para facilitar aos interesados o
aproveitamento das posibilidades que ofrece o programa. O servizo
incluirá deste orientacións iniciais ata o apoio necesario para a
preparación da proposta concreta a presentar, dixo. Tamén sinalou
que o programa, alén de financiamento, constitúe “un excelente
ecosistema de innovación” con servizos de soporte a nivel
internacional: asesoramento, traballo en rede, formación e acceso a
investidores especializados.