Os responsábeis de Blow the Cartidge piden máis apoio formativo para os vindeiros profesionais do sector dos videoxogos
luns, 20 de xaneiro do 2014
Do documental galego
Blow the Cartidge xa
temos salientado o seu gran interese como obra de divulgación e
investigación, non só porque propón un achegamento á
industria dos videoxogos da nosa terra e todo o eido estatal, senón
tamén fornece claves e respostas para todos aqueles que neste intre
estean a barallar a posibilidade de adicarse profesionalmente a este
sector do lecer tecnolóxico. Agora, toca volver falar desta obra
entre outros motivos porque os seus autores (os estudantes de Belas
Artes: Alberto Abal, Rubén Calles, Francisco Pérez e Irene Ríos)
foron
quen de acadar co seu documental a cifra nada desprezábel das 14.000
reproducións na Rede. Ademais, móllanse para propor máis
apoio formativo para unha área profesional que constitúe unha moi
boa oportunidade laboral e creativa.
A curtametraxe Blow
the Cartridge, como dixemos, despexa dúbidas sobre a
viabilidade do sector dos videoxogos como eido profesional para a
nosa mocidade. Despexa dúbidas e lanza unha mensaxe a ter en conta:
sen dúbida que o sector dos videoxogos ten futuro na nosa terra e no
territorio estatal. O único que falta son máis apoios, e non só
das institucións públicas e das empresas ou fondos de investimento,
senón tamén das universidades. Para estes catro estudantes de Belas
Artes, está claro que as universidades deberan ofrecer xa graos
públicos dos que saian os futuros profesionais do sector. Segundo
informa a Universidade de Vigo, os Abal, Calles, Pérez e Ríos
coinciden en afirmar que o futuro desta industria está no mercado
independente. E explican: “Estamos volvendo en gran medida ao
modelo que tiñamos na década de 1980 e que nos levou á cima do
software internacional; pequenos estudios con produtos moi
persoais que se fan un oco nun mercado que a día de hoxe demanda
propostas independentes e orixinais”.
Lembrar que as
pretensións que levaron a estes catro mozos a desenvolver este
proxecto audiovisual pasaron na orixe da iniciativa por “expor
unha visión xeral do estado da industria do videoxogo en España e
as posibilidades que brinda a un novo friki a piques de
rematar os seus estudos”. A idea de Blow the Cartridge
xurdiu a raíz do primeiro exercicio que se expón na materia
Proxectos Videográficos de cuarto curso de carreira. Pois -segundo apuntou recentemente Abal- “a proposta era tan sinxela
como levar a cabo unha peza de corte audiovisual, e nós, sendo como
somos uns obsesos dos videoxogos, non puidemos evitar que a nosa
mente se fose dereita á idea de facer un documental sobre o tema".
Para máis información sobre o documental Blow the cartridge
cómpre visitar o Facebook
habilitado.