Pulo ao proxecto Smarnet para levar o concepto smart ao noso litoral

A empresa galega SIVSA, responsable do desenvolvemento de Fenix (software de xestión integral para médicos e clínicas), vén de anunciar a obtención do financiamento preciso para o proxecto-consorcio Smarnet. Os fondos, achegados a través do programa FEDER Innterconecta (xestionado polo Centro para o Desenvolvemento Tecnolóxico Industrial, o CDTI), servirán para impulsar unha iniciativa (Smarnet) que se dirixe a aplicar o concepto e características propias das contornas smart (Cidades Intelixentes) no ámbito litoral. Por certo que SIVSA actúa como líder do consorcio, no que tamén xuntan forzas empresas SCIO Soft, Sistemas Audiovisuais ITELSIS e Ocean Vision.
Como dixemos, Smarnet encamíñase a afianzar a xestión da nosa costa no ámbito intelixente. “Preténdese”, sinala SIVSA, “dar forma a unha plataforma baseada na tecnoloxía Fiware que dea soporte ao desenvolvemento de aplicacións e servizos asociados ao ámbito litoral-costeiro, tanto para o ámbito profesional como para o público xeral”.
Segundo engade a empresa, “a día de hoxe existen múltiples fontes de información relacionadas co mar nos ámbitos da pesca, a loxística e o transporte, a navegación deportiva, o turismo ou o medio ambiente e a meteoroloxía. Polo tanto, Smarnet preséntase como unha plataforma que permite “unificar o acceso a estes datos e crear aplicacións de valor engadido dunha maneira sinxela, estandarizada e flexible en relación a cambios e adaptacións outras contornas”. Con este último obxectivo, o proxecto conta coa “importante colaboración” de centros tecnolóxicos como o Centro Tecnolóxico do Mar (CETMAR) e o Centro Tecnolóxico de Telecomunicacións (Gradiant).
Con este proxecto, SIVSA quere dar un pulo ao seu espallamento no ámbito do mar coa achega de servizos e solucións avanzados, “afianzando unha apreciada experiencia neste sector, avalada pola propia Administración galega”, engaden fontes da firma galega.