Unha aplicación galega para Android infórmanos dos prezos da luz

Nun momento no que as tarifas do subministro eléctrico doméstico son unha grande preocupación entre os cidadáns por mor dos cambios experimentados nas mesmas nas últimas semanas, a compañía coruñesa Cleventy tivo a ben responder a esta demanda creando unha aplicación móbil para Android chemada EcoLuz, que polo momento ofrece un acceso áxil á información principal a xeito de resumo diario (no que se detallan a hora máis barata, a hora máis cara e o prezo medios) así como unha gráfica horaria de prezos.
Esta ferramenta permite consultar os prezos da luz para o día actual e, a partires das 20:30 horas de cada día, permite tamén a consulta dos prezos do día seguinte, aínda que en futuras versións da aplicación enriquecerán a ferramenta con información de grande interese como a posibilidade de visualizar os prezos da luz para os distintos tipos de contrato (normal, tarifa nocturna ou tarifa de coche eléctrico), consultar os custos da luz en días anteriores e comparar prezos, recibir notificacións para evitar esquecer as horas nas que temos que pór a lavadora ou apagar o calefactor eléctrico se queremos un maior aforro, visualizar o prezo actual, configurar un límite de prezo para que na gráfica se destaque cando se supere e poder elixir entre distintos modos de visualización dos gráficos.
Esta aplicación é totalmente de balde, integrando publicidade, e pode resultar de grande utilidade para os consumidores que busquen optimizar o seu consumo eléctrico en función do seu prezo variable en función da hora.