Uns mozos fan esbourar un iPhone intentando liberalo

O método de reprogramar os móbiles iPhone descuberto por George Hotz era moi complicado e así o facía saber e a xente menos hábil cos cables e soldadores non deberían atreverse a facer tal, como demostraron uns mozos que pretendían liberar o iPhone e, ó abrilo viron como unha nube de fume negro saía do dispositivo, que se quentou esaxeradamente (queimando os dedos dun dos manipuladores) e quedando en evidencia que este tipo de operacións non son para os afeccionados.
Segundo parece, os incautos curtocircuitaron a batería do móbil, ou sexa, que provocaron eles mesmos unha desas explosións que teñen algunhas baterías defectuosas de móbiles e portátiles.
Dende moitas webs recomendan que non se arrisque ninguén a facer este tipo de operación, e mesmo que non se fíe das liberacións do iPhone por software, pois están a aparecer moitos casos de persoas con móbiles supostamente libres que non están totalmente operativos e sempre queda a dúbida de que en actualizacións do iPhone se volva a bloquear o terminal.
Parece que haberá que ter paciencia e agardar uns meses a que o iPhone se venda en España para poder usalo, pois as aventuras coas importacións dos móbiles de Apple poderían saír moi caras.