Núñez Feijoo súmase á reivindicación dunha sede galega para a Axencia Estatal de Radiocomunicacións

Durante a celebración da Noite Galega das Telecomuniacións e da Sociedade da Información 2009, o presidente da Xunta, Alberto Núñez Feijoo, insistiu no feito de que «todos seguiremos traballando, como ata agora, para que a nosa comunidade sexa sede da Axencia Estatal de Radiocomunicacións», o que tamén é unha das máis importantes reivindicacións do Colexio Oficial de Enxeñeiros de Telecomunicacións e da Escola de Telecomunicacións de Vigo, argumentando que «Galicia é xa un referente no mapamundi das telecomunicacións. Unhas 1.500 sociedades no sector, que dan emprego a 13.000 persoas e que teñen un volume de negocio superior aos 4.500 millóns de euros son soamente algunhas cifras que ilustran a súa importancia».
Feijoo lembrou que a Xunta continúa cun «firme propósito de seguir impulsando as telecomunicacións» apoiándose nas súas principais fortalezas: o talento dos profesionais e das empresas e o talento das universidades galegas.

O presidente da Xunta trasladou os seus parabéns aos galardoados no evento organizado pola AETG-COETG, instándoos a seguir «prestixiando Galicia, para seguir achegando a todos os galegos a tecnoloxía e, coa tecnoloxía, o futuro».
No evento tamén participou o secretario xeral de Medios, Alfonso Cabaleiro Durán, quen destacou o obxectivo da Xunta de achegar a TDT ao 100% da poboación galega para evitar unha «discriminación tecnolóxica», asegurando que a primeiros de abril «Galicia será totalmente dixital».
Pola súa banda, Mar Pereira, secretaria xeral de Modernización e Innovación Tecnolóxicas, destacou que o Executivo autonómica asegurou que «unha das liñas de actuación prioritarias da Xunta foi a posta en marcha dunha estratexia global de telecomunicacións que se visualizará nunha primeira fase no Plan director da banda larga, que ten como obxectivo achegar estas oportunidades de futuro a todo o noso territorio».