Até 500 especialistas participan en Santiago nas xornadas sobre RedIRIS

A RedIRIS, o tecido de comunicación de investigadores españois, está estes días máis preto ca nunca da nosa terra. Concretamente, conta cunha temporal sede de operacións na Facultade de Ciencias da Comunicación da Universidade de Santiago, onde se están a celebrar ata o vindeiro día 27 as 20ª Xornadas Técnicas de RedIRIS, uns encontros que, como o seu propio nome indica, van dirixidos a tirar proveito dun escenario común para dar conta das experiencias tecnolóxicas e puntuais dos membros da dita Rede.
Segundo relata a USC, nesta convocatoria estanse a dar cita 500 investigadores TIC de universidades e centros de innovación da comunidade de RedIRIS, incluíndose tamén nas xornadas un total de catorce empresas en calidade de patrocinadoras.
A longo deste encontro, organizado pola propia USC en colaboración co Centro de Supercomputación de Galicia (CESGA), non só está previsto o desenvolvemento de sesións para o intercambio de experiencias entre os devanditos profesionais, senón que o programa tamén inclúe actividades paralelas con relatorios sobre diferentes temáticas (identidade dixital, contidos en rede, seguridade en liña, virtualización, integración de servizos, etc).
No acto de clausura, o vindeiro venres 27, está prevista a presenza do decano da Facultade de Ciencias da Comunicación, Xosé Pereira Fariña, e do director de RedIRIS, Tomás de Miguel. Este acto estará precedido polos relatorios plenarios de Ignacio Martín Llorente, da Universidade Complutense de Madrid, e de Miguel Álvarez Rodríguez, do Ministerio de Presidencia, que versarán sobre OpenNebula: Tecnología Open-source y Basada en Estándares para Cloud Computing e Proyecto STORK: Interoperabilidad de las Identidades Electrónicas en Europa, respectivamente.
Por certo que o programa de actividades ao completo pódese seguir con tecnoloxía streaming dende a páxina web da Rede.