O CNTG e Oracle preparan un obradoiro en Santiago sobre xestión en liña de identidades

A Rede medra e nós con ela. En determinados casos, o éxito das webs maniféstase nun fluxo libre cara os seus contidos de milleiros de internautas. Noutros, trátase de pedirlle aos usuarios máis da súa parte, a cambio de ter o privilexio de participar na construción da web. Para estes e outros exemplos está máis ou menos claro que se preciso algún tipo de ferramenta que axude á xestión de identidades e ao control dos accesos, doutro xeito correríase o risco de deixar o servizo exposto de máis ou de non acadar a implicación internauta que se desexa. O eido deste tipo de ferramentas de xestión é un eido aínda por descubrir, e informar sobre este punto aos nosos profesionais é o gran obxectivo do obradoiro que organizan en Santiago o Centro de Novas Tecnoloxías de Galicia e máis a firma Oracle.
A cita formativa, a desenvolver os días 19, 20 e 21 de xaneiro na sede do dito Centro (no barrio de Conxo), encamíñase a achegarlles coñecemento práctico aos responsables técnicos de sistemas e /ou seguridade dos eidos privado e máis público.
Máis polo miúdo, o obradoiro está dirixido a mellorar os seguintes procesos:
· Xestión de numerosos usuarios ou clientes a nivel de fornecedor de servizo ou micro informática: aprovisionamento de usuarios, administración delegada, etc.
· Xestión dun amplo número de aplicacións ou políticas de seguridade en liña.
Como dixemos, a actividade desenvolverase no CNTG en xornada de mañá e de tarde e en horario continuado, cun breve descanso para o xantar, de 9.00 a 18.00 horas. Polo que atinxe á inscrición, sinalar que deberá facerse en liña a través da web do CNTG neste apartado ou ben neste outro (en ámbolos dous casos premendo en Oracle). O prazo para formalizar a matrícula ficará aberto ata o 31 de decembro.