O 2009 bate récords históricos na creación de novos exemplares de malware

PandaLabs, o laboratorio antimalware de Panda Security –The Cloud Security Company, vén de publicar o seu Informe Anual sobre Malware (arquivo PDF), no que se recollen os principais acontecementos en canto a seguridade informática se refire que tiveron lugar no ano 2009, e a principal nova a destacar radica na creación de 25 novos millóns de exemplares de malware, un récord histórico que non nos gusta nada anunciar.
2009 foi un ano prolífico no que os hackers tiveron a oportunidade de demostrar as súas habilidades na creación de malware e outros vermes informáticos como troianos, rogueware ou diverso spam, posto que destaca a aparición de numerosos exemplares novos de troianos bancarios (un 66 por cento) e dos chamados “falsos antivirus” ou rogueware.
Igualmente, os tradicionais virus, que xa se crían extintos, reapareceron causando importantes danos con exemplares como Conficker, Salita ou o antigo Virutas.
O spam, pola súa banda, mantivo os seus altos niveis de actividade durante este ano e o 92 por cento do tráfico total de correos electrónicos foron spam, sendo os ganchos máis empregados os temas relacionados coas mortes de famosos, a gripe A, supostos vídeos de políticos…
En canto ás vías de distribución, foron as redes sociais (principalmente, Facebook, Twitter, YouTube ou Digg) as favoritas para a difusión de malware nos usuarios, así como os ataques SEO realizados con webs falsas que descargaban este tipo de ataques nocivos.
Os países que maior número de infeccións rexistraron foron Taiwán, Rusia, Polonia, Turquía, Colombia, Argentina e España respectivamente.
Os menos infectados foron Portugal e Suecia.
As predicións de PandaLabs para este ano que recén estreamos son que “o número de malware seguirá a medrar durante 2010”. “Windows 2”, engaden “terá un protagonismo indubidable para os hackers á hora de crear novo malware e medrarán os ataques para Mac, non será o ano para os virus de móbiles e asistiremos a novos ataques políticos a través de Internet”.