Febreiro será un mes tecnolóxico no Centro de Dinamización de Boiro

O Centro de Dinamización da localidade coruñesa de Boiro, ao mando do que se atopan os dinamizadores Natalia Alcalde e Samuel Rodríguez, vén de anunciar oito novos obradoiros que terán lugar no vindeiro mes de febreiro e que van destinados a tódolos veciños e veciñas da zona interesados en coñecer as vantaxes que lle ofrecen as TIC a día de hoxe.
As actividades de achegamento ás Novas Tecnoloxías que se desenvolverán nesta localidade costeira abarcan un pouco de cada ferramenta informática, e van dende a iniciación a esta disciplina ata o manexo do programa de retoque fotográfico Gimp, baseado en software libre.
Os obradoiros a desenvolver en Boiro no vindeiro febreiro son: –Iniciación á informática: un curso aberto á poboación en xeral que ten como principal obxectivo adentrar ás persoas asistentes no mundo das novas tecnoloxías a través do manexo básico de arquivos, cartafoles, páxinas web, documentos dixitais… Desenvolverase do 1 ao 5 de febreiro en horario de 11 a 13 horas. –Mecanograía: este obradoiro está destinado a toda a cidadanía en xeral e ten como obxectivo que as persoas asistentes collan soltura no manexo do teclado e poidan escribir a unha velocidade considerable empregando para elo todos os dedos das mans. Desenvolverase dende o 2 ao 10 de febreiro, en horario de 18:30 a 20:30 horas. –Iniciación a Internet: destinado a toda a poboación, este curso ten como finalidade que as persoas asistentes coñezan a Rede de primeira man e aprendan os recursos básicos que poden empregar no seu quefacer diario. –Retoque fotográfico: Gimp: este curso, que se desenvolverá do 15 ao 22 de febreiro, en horario de 11 a 13 horas, busca capacitar ás persoas asistentes no retoque básico de imaxes dixitais, empregando un programa baseado en software libre. –Folla de cálculo: un curso destinado á poboación que teña uns coñecementos mínimos de informática e que pretende formar ás persoas asistentes no manexo dunha ferramenta ofimática básica. Terá lugar do 18 ao 24 de febreiro, en horario de 18:15 a 20:15 horas. –Procura de información na Internet: googlear: con esta temática, o CDSI de Boiro levará a cabo tres obradoiros, de 8 horas cada un, nos que as persoas destinatarias se adentrarán no manexo do buscador máis popular en Internet, aprendendo a facer as súas propias procuras e a optimizar os resultados obtidos en Google.
Esta destinado ás persoas maiores de 60 anos, e desenvolverase os martes, mércores e xoves de 16 a 18 horas.
O prazo para inscribirse nestes cursos, ao igual que vén sendo habitual en outros Centros de Dinamización, remata o día antes ao comezo de cada unha das actividades, ou tamén cando se esgoten as prazas reservadas para cada unha.