Microsoft anuncia beneficios récord grazas á demanda de Windows 7

Microsoft Corporation, a compañía líder mundial en software, que logo do fracaso do sistema operativo Windows Vista, curouse en saúde lanzando o Windows 7 en outubro do pasado ano, vén de anunciar uns ingresos récord de 19.020 millóns de dólares no segundo trimestre fiscal, finalizado o pasado 30 de decembro de 2009, o que indica un crecemento do 14 por cento respecto ao mesmo periodo do ano anterior.
O beneficio operativo da compañía, o beneficio neto e o beneficio diluído por acción neste trimestre foron, respectivamente, de 8.510 millóns de dólares, 6.660 millóns de dólares e 0,74 dólares por acción. Estas cifras supoñen un crecemento substancial se comparamos os datos cos acadados no 2008.
A propia compañía admite que estes resultados económicos “reflicten o recoñecemento duns ingresos diferidos de 1.710 millóns de dólares relativos ao programa Windows 7 Upgrade Option e as pre-vendas de Windows 7 aos fabricantes de equipos e minoristas antes da dispoñibilidade xeral do novo sistema operativo”. Axustando o recoñecemento destes ingresos postergados, engaden, “os ingresos no segundo trimestre suman 17.310 millóns de dólares e os beneficios diluídos son de 0,60 dólares por acción”.
A excepcional demanda de Windows 7, dende que se lanzou no pasado mes de outubro, foi a principal causa deste positivo crecemento da compañía, e segundo afirma o seu director financieiro, Peter Klein, “o seu constante compromiso de xestión de custes fixeron posible que o rendemento en beneficios estivera por enriba do crecemento dos ingresos”.
Cabe destacar que durante o segundo trimestre do pasado 2009, Microsoft vendeu máis de 60 millóns de licenzas de Windows 7, convertíndoo no sistema operativo máis rápido da historia en acadar estas cifras.