A TDT chega de xeito exclusivo a máis da metade da cidadanía galega

A TDT prosegue o seu avance na nosa terra como plataforma única de acceso á tecnoloxía dixital para un bo número de familias (as que non contaban con cable nin con satélite), e o proceso, a medida que se desenvolve, vai deixando información que nos axuda a enxergar o seu alcance. O informe deste luns, data sinalada pola Xunta para dixitalizar catro grandes núcleos de poboación (A Coruña, Ferrol, Santiago e Ourense) e cidades de tamaño medio como Narón ou Vilagarcía, é especialmente significativo, e máis se temos en conta que pon de manifesto que xa máis da metade da cidadanía galega conta de maneira exclusiva con acceso á TDT.
Os traballos, informa o departamento responsable deste despregue (a Secretaría Xeral de Medios) desenvolveuse con normalidade e sen que “se rexistrasen grandes incidencias”. E isto, puntualiza a Xunta, malia que a complexidade técnica dos pasos dados hoxe foi moito maior cá das xornadas anteriores.

Os ceses de hoxe, engádese no informe, producíronse en centros emisores principais como o do Pedroso (Compostela), o de Meda en Ourense) ou o de Bailadora (en Ares). Deste xeito, logo dos apagamentos previos e do labor desenvolvido hoxe, pódese dicir que o 56% dos cidadáns galegos, arredor de 1.550.000 persoas de 203 concellos da nosa terra, vén en exclusiva a Televisión Dixital Terrestre.
Dos 95 concellos nos que se desenvolveu o apagado hoxe, 45 pertencen á provincia da Coruña (Ames, Ares, A Baña, Bergondo, Boimorto, Boqueixón, Brión, Cabanas, Camariñas, A Capela, Cariño, Cerdido, A Coruña, Dumbría, Fene, Ferrol, Frades, Mazaricos, Mesía, Miño, Mugardos, Narón, Neda, Negreira, Noia, Oleiros, Ordes, Oroso, Ortigueira, Outes, Padrón, O Pino, Rois, Sada, Santa Comba, Santiago de Compostela, Santiso, Sobrado, Toques, Tordoia, Trazo, Valdoviño, Vedra, Vilasantar e Vimianzo); 4 á provincia de Lugo (Carballedo, Pantón, Sober e O Vicedo); 40 á provincia de Ourense (Arnoia, Avión, Barbadás, Beade, Beariz, Boborás, Carballeda de Avia, Carballeda de Valdeorras, Cartelle, Castrelo de Miño, Castro Caldelas, Chandrexa de Queixa, Coles, Cortegada, Entrimo, Esgos, Gomesende, Leiro, Lobeira, Lobios, Melón, A Merca, Nogueira de Ramuín, Ourense, Paderne de Allariz, Padrenda, Parada de Sil, Pereiro de Aguiar, A Peroxa, A Pobra de Trives, Pontedeva, Quintela de Leirado, Ramirás, Ribadavia, Rubiá, San Cristovo das Viñas, San Xoán de Río, Taboadela, A Teixeira e Xunqueira de Espadañedo); e 6 á provincia de Pontevedra (Caldas de Reis, Catoira, Crecente, A Illa de Arousa, Vilagarcía de Arousa e Vilanova de Arousa).