Os alcaldes terán que dar conta na Rede das súas propiedades

Coa Administración Electrónica, se ninguén o impide e as malas xogadas da longa listaxe de políticos corruptos que existe non acaban por estragar o seu potencial, tería que mellorar a transparencia no que a patrimonio dos representantes públicos se refire, entre outras moitas cousas. Deste xeito, dando conta do que se move e do que se deixa de mover na carteira de alcaldes e concelleiros, estariamos a frear unha das prácticas máis estendidas de calquera territorio onde haxa votantes e votados: o roubo municipal. Ou, polo menos, contribuiriamos a elo. Pois ben, este precisamente é un dos alicerces do anteproxecto de lei de goberno Local que o Executivo comeza a negociar hoxe co PP na súa fase de proxecto, e que segundo fan fincapé medios como Xornal.com, suporía un bo comezo para conter a escalada de corrupción.
Para comezar, estableceríase que cada alcalde e cada concelleiro estaría obrigado a publicar na Rede o seu patrimonio co obxectivo de ser consultado polos veciños que o desexaran.
A listaxe de cousas das que se pode obter información completaríase con licenzas de obras, contratos, convenios e plans de ordenación urbana con todos seus hipotéticos cambios. A idea disto é acadar a máxima supervisión posible sobre os movementos dos concellos neste eido. En termos do Ministerio de Política Territorial que dirixe Manuel Chaves, o obxectivo principal da medida é “dispoñerlle atrancos con este aumento da transparencia á posibilidade da corrupción nos concellos”.
O texto abrangue e pon en valor o rascuño da reforma da Lei de Bases de Réxime Local de 1985 que o equipo de Jordi Sevilla (ex ministro de Administracións Públicas) levou a cabo hai uns anos.