Advirten da proliferación de fármacos falsos ao abeiro da Rede

Os medicamentos, xa de por si perigosos de non empregarmos o sentido común, dobran o seu potencial negativo se a súa comercialización adquire feitura de mercado libre, ao servizo das mafias e de toda aquela persoa á quen lle importa ben pouco cobrar de máis, adulterar ou especular. A Rede, con todas as súas vantaxes de liberdade comunicativa, tamén dá liberdade a outros procesos máis dubidosos, entre os que se conta o mercado de medicamentos, precisamente. Segundo estudos de Atlas reflectidos pola Plataforma SINC, cada vez véndense máis fármacos sen receita a través de Rede, ben sexa porque se pon en xogo a vantaxe do anonimato (que nos evitaría ter que dar explicacións sobre o noso problema), ben sexa porque cada vez é máis enleado acadar unha receita. Amais disto, cómpre engadir o factor económico, xa que nalgúns casos, non en todos, temos ao noso alcance medicamentos máis baratos a través da Rede que coas canles habituais.
Con todo, sinálase no estudo, a meirande parte destas medicinas son falsas e prexudican a saúde.
Nesta liña de descubrir o fraude en liña é onde traballa a Brigada de Investigación Tecnolóxica da Policía, que detecta decote ducias de páxinas webs con todo tipo de medicamentos falsos e/ou prohibidos, con todas as vantaxes que isto ten para o que vende (que no caso de comercializar un fármaco falso, feito de calquera substancia moi económica, pode obter grandes beneficios) e con todos os efectos negativos que ten para quen merca (gasta máis do que debe e non obterá ningunha das propiedades positivas do medicamento e probablemente unha boa parte das negativas).
Segundo se conta, os máis falsificados son os adelgazantes, os antitabáquicos, os analxésicos ou os fármacos para a impotencia. Nos pasados días de febre informativa (que non real) da gripe A rexistrouse un importante repunte dos antigripais, informa a Brigada. Para que se vexa ata onde chega o negocio dos fármacos falsos pola Rede, dicir que en 2009 en España xerou un volume de arredor de 1.500 millóns de euros.