Só a metade dos autónomos dispón de equipamento informático

Segundo o informe O traballador autónomo e a Sociedade da Información que o ente Fundetec presentou a semana pasada, dos autónomos que hai arestora en España só a metade contan con equipamento informático, máis polo miúdo o 52%. O estudo, que aparece estes días reflectido na web de Emprendia, sinala tamén que dos autónomos con recursos para a xestión dos seus datos, non todos teñen o que se precisa para empregar eses equipos en labores de comunicación e promoción. De feito, o 17% aínda non tiña acceso a Internet en 2009. Con todo, cómpre recoñecer que as cousas melloraron dende marzo de 2007, intre no que demos conta dunha situación máis que preocupante, a vida non dixital de máis dun terzo dos autónomos do Estado.
Volvendo aos datos actuais, dicir que o estudo de Fundetec bota luz sobre un escenario moi mellorable en materia de acceso ás redes e uso integral delas. Así, sinálase, só un 17,3% deste colectivo efectúa as súas compras a través da Rede (a taxa sube ao 35% no caso dos equipados), baixando aínda máis as cifras se falamos de vendas en liña, que só motivan ao 6,5% do colectivo (un 45% dos que teñen sitio web).
O estudo tamén achega información sobre as causas deste escaso afianzamento das redes entre estes traballadores. A xuízo dunha boa parte dos que non teñen conexión nin páxina propia de seu, a razón principal está na falta de utilidade para o seu negocio. Por eidos de actividade, o sector financeiro é o que máis fondas raizames ten na sociedade dixital, cun 70% dos autónomos contando con equipo informático. No outro extremo temos o transporte e o almacenamento, que anda a rentes do 22%.